سرسہبی تے مدامگی زرگزرانی شونداری ٹی بدل کننگ آ چکار کننگ اُن،وزیر خزانہ محمد اورنگزیب

اسلام آباد، بنجائی وزیرِ خزانہ و بنگکاری سینیٹر محمد اورنگزیب آئی ایف سی نا پاکستان، اوغانسان، کرغز جمہوریہ، تاجکستان و ترکمانستان نا ڈائریکٹر، مسٹر سائمن اینڈریوز تون اوڑدہی کرے۔ اوڑتون آئی ایف سی پاکستان نا پرنسپل کنٹری آفیسر، ناز خان ہم اوار ئس۔ اوڑدہی ٹی پاکستان اٹی پرائیویٹ بشخ انا شونداری، زرکاری و مالی آسراتی اسکان رسینگ ءِ ودفنگ کن آئی ایف سی نا برجا و گمانی کمک آ گ وتران کننگا۔ وزیرِ خزانہ آئی ایف سی نا نمائندہ غاتے بخیر کرے و پاکستان تون اونا پدریسہ شریداری ناستاءِ کرے‘ خاص وڑ اٹ پرائیویٹ بشخ اکن مالی کمک و زرکاری آتالان زرگزرانی شونداری نا رد اٹ۔ او پوریاگر، چنکا و نیامی کہول انا کاروبار، کشت وکشار‘ اڑزان اُرا و سرکاری و پرائیویٹ بشخ انا شریداری ءِ پرائیویٹ زرکاری ودفنگ نا اہم بشخ گوندا۔ سینیٹر محمد اورنگزیب پاکستان اٹی گچین مروک زرگزرانی سوگوی و زرکاری تا ودوک آ پت ءِ نمان کرسا پارے کہ حکومت داسہ دا سرسہبی تے پین زرکاری‘ زرکار نا ٹہیفنگ و پرائیویٹ بشخ انا کماشی ٹی مدامگی زرگزرانی شونداری اٹی بدل کننگ آ چکار کننگ اٹی ءِ۔ او ملکی و جہانی وپرائیویٹ زرکاری کن گچین چاگڑد ودی کننگ و مالی آسراتی اسکان رسینگ ءِ ودفنگ نا اہمیت آ زور شاغا۔ آئی ایف سی نا نمائندہ غاک وزیرِ خزانہ ءِ پوریاگر آتیکن پوسکن ءُ فنڈ اس جوڑ کننگ نا پیشرفت آن معلومدار کریر‘ ہرا تعلقدار شریدار آتا کمکاری اٹ تیار کننگ انگ ءِ تاکہپاکستان اٹی پوسکن آ کاروبار و اسٹارٹ اپ آتے شون تننگ مرے۔ او اڑزان اُراتا بشخ اٹی ہم پیشرفت آن معلومدار کریر، ہراڑے تفوئی ڈٹ آتیکن مالی کمک نا کمک اٹ اُراتا فراوانی ءِ ودفنگ نا گمان آ کاریم کننگ انگ ءِ‘ کشاری بشخ اٹی ہیت و گپ آئی ایف سی نا ایگری کنیکٹ گام آ چکار کننگا۔ داٹی کشاری گڑاتے رکھوک تخنگ نا گچین آسراتی و الیکٹرانک ویئر ہاؤس رسید آتے ضمانت نا وڑ اٹ کاریم اٹ اتسا بزغر آتا و زرعی بشخ اکن پرائیویٹ وام و زرکاری اسکان رسینگ ءِ ودفنگ آ گپ وتران کننگا۔