پاکستان نا ڈیجیٹل ہیلتھ گچینی تا جہانی کہول آ پن، بلوچستان نا جانجوڑی وزیر ایشیا پیسفک کانفرنس اٹ خاص انگا مہمان

کولمبو، صوبائی وزیرِ جانجوری بلوچستان بخت محمد کاکڑ سری لنکا نا دارالحکومت کولمبو ٹی اڈ ہلوک ڈی ایچ آئی ایس ٹو ایشیا پیسیفک کانفرنس 2026 نا بنائی دود اٹی خاص انگا مہمان نا وڑ اٹ بشخ ہلک۔ ایشیا و ایلو ڈیہہ تا 26 ملک آتا نمائندہ غاتا ساڑی گری ٹی پاکستان نا نمائندگی ءِ کرسا او بلوچستان اٹی جانجوڑی نا بشخ نا ڈیجیٹلائزیشن، انتظامی اصلاحات و حساب کتاب آ تالان پالیسی سازی تون تعلقدار پیش رفت ءِ پیدوار کرے۔ سری لنکا سر مننگ آ وزیرِ جانجوڑیبلوچستان نا ایئر پورٹ آ پاکستانی سفارتی کمامدار، ہرافتے ٹی افتخار حسین ہم اوار ئس، بخیر کریر۔ کانفرنس نا ہند آ سری لنکا نا سیکرٹری جانجوڑی‘ جہانی ادارہ جانجوڑی نا سری لنکا ٹی نمائندہ، ہسپ ایشیا، ہسپ سری لنکا و ایلو تعلقدار ادارہ غاتا عہدیدار تا کنڈ آن اودے جم وجوش اٹ بخیر کننگا۔ بنائی دود آن تران کرسا وزیرِ جانجوڑی بلوچستان جانجوڑی نا نظام اٹی ڈیجیٹل ٹیکنالوجی نا بھرمی کاریم اٹ اتنگ آ ہیت کرے۔ اونا تران اٹی ڈی ایچ آئی ایس ٹو نا کمک اٹ جانجوڑی نا معلومداری نا وخت آ دوئی مننگ، رپورٹنگ نا گچینی‘ طبی ادارہ غاتا کارکڑد نا جاچ و شاہدی آ تالان فیصلہ سازی ءِ نمان کننگا۔ بلوچستان اٹی برجا اصلاحات آتے الس اسکان گچین خذمت تا فراوانی، وسیلہ غاتا بھرمی بشخ و پانٹ و انتظامی پرسجو تون گنڈنگ نا اہمیت ءِ ہم پیدوار کننگا۔ دا وخت آ اوسلو یونیورسٹی، ناروے، نا نمائندہ غاتا کنڈ آن وزیر جانجوڑی بلوچستان بخت محمد کاکڑ نا سرکڑدہی و صوبہ ٹی جانجوڑی نا بشخ انا ڈیجیٹلائزیشن کن ہرفوک گام گیج آتا خاص ستاءِ کننگا۔ بلوچستان نا پیشرفت ءِ رسینگوک جہانی شرف آن پاکستان اٹی ڈیجیٹل ہیلتھ نا شون تننگ و جانجوڑی نا نظام ءِ پوسکنوڑ کننگ نا کوشست آک نمان مسر۔ کانفرنس اٹی بی ایچ ایم آئی ایس، بی ایچ آئی ایس ڈی یو و ڈی ایچ آئی ایس ٹو نا صوبائی کوآرڈینیٹر ڈاکٹر ابابگر بلوچ نا خذمت و عملی کوشست آتا ہم سستاءِ کننگا۔ بلوچستان اٹی جانجوڑی نا معلومداری نا نظام ءِ سوگو کننگ، ڈیجیٹل اصلاحات نا نفاذ، رپورٹنگ نا گچینی و حساب کتاب نا بھرمی کاریم اٹ اتنگ کن اونا کڑد انا ستا کننگا۔ بلوچستان اٹی دا اصلاحات آتے مستی دننگ اٹ یونیسف بلوچستان و ہسپ پاکستان نا تکنیکی کمک و اواری ہم اہم ئس۔