مچ آ دنیا ٹی کورونا غان زہمی مروک آتا کچ 41 لکھ آن گدرینگا

نیو یارک( آن لائن) جہانی وبا گوندنگوک کورونا وائرس آن مچ آ دنیا ٹی زہمی آ بندغ آتا کچ 41 لکھ اسہ ہزار آن زیات مسنے، وخت اس کہ زوال مروک آتا کچ اِرا لکھ 80 ہزار آن گدرینگانے۔ درملکی خبر ایجنسی نا رد اٹ مچ آ دنیا ٹی داتم اسکان تینا سوگو آ پت، یخین و گچین مدافعتی نظام نا سوب آن 14 لکھ 41 ہزار آن زیات بندغ کورونا ءِ بے سہب کرینو۔ رپورٹ نا رداٹ امریکہ ٹی کورونا وائرس آن زہمی بندغ آتا کچ 13 لکھ 47 ہزار آن ودانے، وخت اس کہ 80 ہزار آن زیات مرک ریکارڈ کننگانو۔ اسپین اٹی کورونا غان زہمی بندغ آتا کچ 2 لکھ 62 ہزار آن زیات مسنے۔ ہندا وڑ اسپین اٹی زوال مروک آتا کل کچ 26 ہزار 4 سَد آن ودانے، اٹلی ٹی کورونا غان زہمی بندغ آتا کچ اِرا لکھ 18 ہزار آن زیات مسنے، وخت اس کہ زوال مروک آتا کچ 30 ہزار 3 سَد آن زیات مسنے، برطانیہ ٹی کورونا غان زہمی مروک آ ناجوڑ آتا کچ اِرا لکھ پانزدہ ہزار آن ودانے۔ برطانیہ ٹی 31 ہزار 5 سَد آن زیات بندغ داعی اجل ءِ لبیک کرینو۔ فرانس اٹی اسہ لکھ 76 ہزار آن زیات بندغ داتم اسکان کورونا وائرس آن زہمی مسنو۔ حوال آتا رد اٹ زوال مروک آتا کل کچ 26 ہزار 3 سَد آن ودانے، جرمنی ٹی ہم کورونا نا سوب آن مرک انا چرجوئی برجا ءِ۔ دوئی حساب آتا رد اٹ داتم اسکان ہفت ہزار 540 آن زیات مرک مسنو۔ کورونا غان زہمی مروک آ بندغ آتا کل کچ اسہ لکھ 71 ہزار آن گدرینگانے۔ ترکی ٹی کسفوک آ وائرس آن مروک آ مرک آتا کچ مسہ ہزار 700 آن گدرینگانے۔ و اسہ لکھ 37 ہزار آن زیات بندغ زہمی مسنو۔