دہشت گردی نا برخلاف جنگ اٹی پولیس نا کڑد بھاز زیات اہم ءِ،وزیراعلیٰ بلوچستان میر سرفراز بگٹی

کوئٹہ، وزیراعلیٰ بلوچستان میر سرفراز بگٹی نا کماشی ٹی صوبہ ٹی سیکورٹی و پولیسنگ نا نظام ءِ پین گچین و پوسکنوڑ کننگ نا رد اٹ بڑزکو کہولی دیوان اس اڈ ہلک، ہراٹی صوبہ نا جم سیکورٹی حالیت، پولیس اصلاحات، پوسکنوڑ ٹیکنالوجی نا کاریم اٹ اتنگ و دہشت گردی نا چیلنج آتتون مون تننگ کن گام گیج آتا جم جاچ ءِ ہلنگا۔ دیوان اٹی ایڈیشنل چیف سیکرٹری داخلہ محمد حمزہ شفقات و انسپکٹر جنرل پولیس بلوچستان محمد طاہر خان سیکورٹی حالیت، پولیسنگ نا نظام، محکمانہ اصلاحات و سیکورٹی گام گیج آتیا جم بریفنگ تسر۔ دیوان اٹی بلوچستان اٹی سیکورٹی و پولیسنگ نا نظام ءِ پوسکن آخواست آتتون ہمگرنچ کننگ کن کوئٹہ انٹیگریٹڈ سیکورٹی پروجیکٹ بنا کننگ نا فیصلہ کننگا۔ بریفنگ اٹی پاننگا کہ کوئٹہ گرین ڈیجیٹل کوریڈور نا رد اٹ شار اٹی 2 ہزار900 کیمرہ خلنگک، ہرافتیان سیکورٹی نا ہننگ نا نظام ءِ پین گچین جوڑ کننگک۔بریفنگ اٹی پاننگا کہ پروجیکٹ نا رد اٹ کوئیک رسپانس فورس انا پوسکن آ اسٹیشن تے ہم جوڑ کننگک تاکہ ہر وڑ انا ہلہلہ ئی حالیت آتے ٹی دمدستی و گچین ردِ عمل ءِ پک کننگ مرے۔ پوسکنوڑ ٹیکنالوجی و تعلقدار کمانڈ اینڈ کنٹرول نظام نا کمک اٹ سیکورٹی ادارہ غاتا کاریمی واکداری کچ اٹ ودکی کننگک۔ دیوان ءِ بلوچستان پولیس اٹی برجا اصلاحات و محکمانہ خود احتسابی نا عمل آن ہم آگاہ کننگا۔ بریفنگ اٹی پاننگا کہ غیر حاضری وزمواری تے ٹی ڈیوالئی کروک 871 پولیس کارندہ غاتے برطرف کننگانے، وخت اس کہ جتاجتا شخصیت آتتون تعینات 1ہزار005 پولیس کارندہ غاتا خذمت آتے پدی محکمہ پولیس ءِ تننگانے۔ وزیراعلیٰ میر سرفراز بگٹی پارے کہ دہشت گردی نا برخلاف جنگ اٹی پولیس نا کڑد بھاز اہم ءِ، پولیس کارندہ غاک فرنٹ لائن آ ملک و صوبہ نا امن کن تینا جان تے ندر کننگ اٹی ءُ۔ او پارت کرے کہ پولیس ءِ دہشت گردی نا ساڑی چیلنج آتتون مون تننگ کن پوسکنوڑ ہیلکاری‘ المی ازباب و کل خواست کروک وسیلہ فراوان کننگے۔ وزیراعلیٰ پارے کہ پولیس ءِ دہشت گردی نا برخلاف پڑ آ ایسوسنن تو پورو کاٹم خواجہی ہم کینہ۔ صوبائی حکومت تینا بہادر پولیس و سیکورٹی فورس آتتون سلیسنے و پولیس نا کاریمی واکداری کچ اٹ ودکی کن وس انا کچ آ کمکاری فراوان کننگک۔ میر سرفراز بگٹی پارے کہ پولیسنگ نا نظام اٹی اصلاحات نا مسخت ادارہ ءِ پین سوگو، جوابدہ و الس دوست جوڑ کننگ ءِ۔ محکمانہ نظم و ضبط و احتساب آ ہچ ءُ سمجھوتہ اس کننگپک وخت اس کہ زمواری تے ٹی ڈیوالئی و غیرحاضری نا حوصلہ شکنی تون اوار گچین کارکڑد نشان تروک کارندہ غاتا است بڈی ءِ کننگک۔