امن نا رکھ بیرہ واک آن مننگ کیک‘ مکہ اسیجائی دفاعی معاہدہ اسہ تاریخی ءُ گام اسے،گورنر بلوچستان جعفر خان مندوخیل

کوئٹہ،گورنر بلوچستان جعفر خان مندوخیل پارینے کہ امن نا رکھ بیرہ واک اٹ مننگ کیک۔ ہراتم مسہ ایلم اسلامی ملک آتا دفاعی لائخی سوگو مرے تو بیداد اسے نا جلہو سرسہب مننگ کپک او مکہ مکرمہ ٹی پاکستان، سعودی عرب و ترکیہ نا نیام اٹی پک مروک اسیجائی معاہدہ ءِ تاریخی گوندا‘ دا معاہدہ مسہ ایلم ملک آتا نیام اٹی سلامتی، ایلمداری و پت آ تالان اسہ اسیجائی آخبت اسے نا قول ءِ‘ دا معاہدہ نئے بیرہ ننے مون تروک چیلنج آتتون مون تننگ نا لائخ کیک بلکن مچ آ ڈیہہ اٹی سلامتی و سوگوی نا احساس ہم ودی کیک‘ گورنر مندوخیل پارے کہ وخت اتون اوار ایلو چنکا ملک آک ہم دا تاریخی معاہدہ نا بشخ جوڑ مننگ کیرہ، انتئے کہ تنیا سلنگ اوفتے پین نزور کیک وخت اس کہ اسہ سوگو ءُ بنجا مدام تینا ایب کیب آ جوان آ زہم شاغک۔ ہراتم مسلم دنیا نا بھلا واک آک ہم گرنچی ودی کیرہ تو داڑان مچ آ ڈیہہ اٹی امن پک مریک۔ ہرانا نتیجہ ٹی واپاری منڈیک پین پتداری مریرہ، سیمک رکھوک مریرہ و ننا الس تینے رکھوک سرپند مریک او مستی پارے کہ کنے پورو یقین ءِ کہ آخبت اٹی اگ ایلو ایلم ملک آک داٹی اوار مسر تو دا پنجر تین پہ تینی کمکاری، زرگزرانی شریداری و جم سلامتی کن اسہ ودی و بھلو سیوت اسے نا دروشم تینائی کیک۔