مکہ اسیجائی دفاعی معاہدہ ڈیہہ نا ساڑی حالیت آتا رِد اٹی اسہ تاریخی ءُ مزل نا نشان اسے،سینئر صوبائی وزیر میر محمد صادق عمرانی

کوئٹہ، بلوچستان نا سینئر صوبائی وزیر، پیپلز پارٹی نا سینٹرل کمیٹی نا باسک، پارلیمانی لیڈر و صوبائی وزیر آبپاشی میر محمد صادق عمرانی مکہ مکرمہ ٹی سعودی عرب، ترکیہ و پاکستان نا نیام اٹی پک مروک دفاعی معاہدہ ءِ ڈیہہ انا ساڑی حالیت آتا رِد اٹی اسہ تاریخی ءُ مزل نا نشان اس گوندا‘ تینا مبارکبادی کلہو اٹی صوبائی وزیر پارے کہ مسہ ایلم اسلامی ملک آتا سروک آتا ساڑی گری ٹی معاہدہ غا دستخط کننگ، دا ملک آتا نیام اٹی ساڑی تاریخی و اخلاقی حال حوال اسیجائی اسٹریٹجک فائدہ و دفاعی کمکاری نا ڈیک ءِ ایتک۔ میر محمد صادق عمرانی پارے کہ دا دفاعی معاہدہ نا مسخت سعودی عرب، ترکیہ و پاکستان نا جم سلامتی ءِ سوگو کننگ و ڈیہہ و دنیا ٹی امن و سوگوی کن کمکاری ءِ شون تننگ ءِ۔ او پارے کہ مکہ مکرمہ ٹی پک مروک دا معاہدہ اسہ پیدوار ءُ کلہو اسے کہ دا ہرمسٹ آ ملک آتیٹی اسہ ملک اسے آ ہم اگہ جلہو یا بیدادی اس مس تو اونا ورندی جم وڑاٹ تننگک۔ دا معاہدہ ہرمسٹ آ ملک آتا وتواجہی و سلامتی ءِ مون تروک خلیس اسے نا اسیجائی وڑاٹ مون تننگ نا عزم ءِ پک کیک۔