شاری تا جان و مال انا رکھ حکومت نا بنداوی زمواری ءِ،کمشنر کوئٹہ ڈویژن

کوئٹہ، صوبائی اسمبلی ملک نعیم خان بازی نا کماشی ٹی بازئی قبیلہ نا اسہ ڈل اس کمشنر کوئٹہ ڈویژن ذیشان لاشاری تون اوڑدہی کرے، ہراٹی اغبرگ و نوحصار اٹی قبیلہ غاتے مون تروک ویل، امن وایمنی نا حالیت و سیکورٹی چیک پوسٹ آتتون تعلقدار باندات آتیا جم گپ وتران کننگا۔ اوڑدہی نا وخت آ قبائلی متبر آک سیکورٹی چیک پوسٹ آتا بابت تینا گڑتی و ہندی آبادی ءِ مون تروک مشکل آتیان کمشنر ءِ معلومدار کریر۔ قبائلی ڈل چندی چیک پوسٹ آتا فائدہ‘ ساڑی ہند، فعالیت و گمانی بدل کننگ تون تعلقدار باندات آہم جم بریفنگ تس۔ قبائلی متبر آک پاریر کہ بھاز آ سیکورٹی چیک پوسٹ آک علاقہ نا امن و رکھ اکن اہم ءُ، ولے بھازہند آتیا الس ءِ مشکل مونی تروئی تمنگ اٹی ءِ‘ او خواست کریر کہ چیک پوسٹ آتے بدل کننگ و فعال کننگ نا بابت ہندی آبادی نا گڑتی تیا تالان راستکی تیا چکار کننگے‘ دا وخت آ کمشنر کوئٹہ ڈویژن ذیشان لاشاری قبائلی ڈل ءِ ویل آتے اولیتی بنداو تیا ایسر کننگ نا باوری کرفسا ڈپٹی کمشنر کوئٹہ ویسٹ ءِ چیک پوسٹ آتتون تعلقدار قبیلہ غاتا گڑتی تے مر کننگ کن المی گام گیج نا پارت کرے۔ کمشنر پارت کرے کہ تعلقدار علاقہ غاتا دورہ ءِ کرسا چیک پوسٹ آتا ساڑی حالیت، گرج و الس ءِ مون تروک مشکل آتا جاچ ءِ ہلنگے و دا بابت رپورٹ پیش کننگے۔ او پارے کہ چیک پوسٹ آتے بدل کننگ و فعالیت تون تعلقدار راستکی تا جاچ ءِ ہلسا زوت رپورٹ پیش کننگے۔ ذیشان لاشاری پارے کہ علاقہ ٹی امن ایمنی کن وس انا کچ آگام گیج کننگک۔ شاری تا جان و مال انا رکھ حکومت نا بنداوی زمواری ءِ و دا بابت سنجیدہ گام گیج کننگ انگ ءِ‘ کمشنر کوئٹہ ڈویژن پارے کہ الس و قبائلی متبر آتا گڑتی تے سنجیدگی اٹ ہلنگک و سلاہ اٹ ویل آتا ایسری کن گام گیج کننگک۔ اوڑدہی اٹی ملک عبدالرحمان بازئی تون اوار ایلو قبائلی متبر آک ساڑی ئسر۔ قبائلی ڈل ویل آتا ایسری کن دمدستی گام گیج کننگ نا باوری کرفنگ آ کمشنر کوئٹہ ڈویژن نا منتواری ءِ ہرفے۔