ہلہلہ حالیت آتیٹی ایمرجنسی ریسکیو سینٹر 1122 نا خذمت ستاکڑزک،کمشنر لسبیلہ ڈویژن

کمشنر لسبیلہ ڈویژن سائرہ عطاء پارینے کہ ہلہلہ ئی حالیت آتیٹی و خاص وڑ اٹ ساڑی سیکورٹی حالیت آتا رد اٹ ایمرجنسی ریسکیو سینٹر 1122 نا خذمت آک ستا کڑزرہ، لسبیلہ ڈویژن نا انتظامیہ ریسکیو ادارہ نا وس انا کچ آ است بڈی ءِ کیک‘ دا ہیت آتے او دوشنبے نا دے کمشنر لسبیلہ ڈویژن نا حب کیمپ آفس اٹی ایمرجنسی ریسکیو سینٹر ملازم آتا ڈل اتون ہیت و گپ کرسا کرے۔ کمشنر لسبیلہ کوسٹل ہائی وے و آر سی ڈی شاہراہ غا خاخر لگنگ نا واقعہ غاتے ٹی ریسکیو 1122 ملازم آتا فائر فائٹنگ ازباب آتا کمتی و ریسکیو ادارہ نا ملازم آتا تنخواہ تے بند کننگ نا ویل ءِ دمدستی ایسر کننگ نا باوری کرفے۔ کمشنر لسبیلہ ڈویژن سائرہ عطاء پارے کہ لسبیلہ ڈویژن نا کل علاقہ غاتیٹی انسانی جان تے بچفوک آ کل آن بھلا ہلہلہ ئی ادارہ مرک ریسکیو 1122 نا ویل آتے اولیتی بنداو آ ایسر کننگک، تکنیکی ہیومن ریسورس ءِ پوسکنوڑ آسراتی فراوان کننگک۔ کمشنر لسبیلہ ڈویژن ءِ مرک ایمرجنسی ریسکیو سینٹر نا مانیٹرنگ آفیسر بریفنگ اٹی پارے کہ ادارہ نا 128 ریسکیو ملازم تدوک آ مسہ تُو آن تنخواہ تے ہننگ اٹی ءُ، کوسٹل ہائی وے و آر سی ڈی ہائی وے آ مرک ایمرجنسی رسپانس سینٹر اٹی تعینات ڈرائیور‘ ایمرجنسی میڈیکل ٹیکنیشن، فائر ریسکیورز و کنٹرول روم آپریٹر آک سال 2019ء آن پروجیکٹ نا بنداو آ تینا زمواری تے سر ترسا بسنو۔ نومبر 2025ء اٹی پروجیکٹ نا وخت پورو مننگ تون ہیلتھ ڈیپارٹمنٹ انڈرٹیکنگ ہلک۔ تدوک آ 8 سال اٹ ریسکیو ملازم آک ہزار آ روڈ ایکسیڈنٹ، است انا دورہ، چنا خننگ نا کیس، خاخر و قدرتی آفت آتیٹی تینا جان تے دلدست آ تخسا ہزار آ نہادی جان تے بچفینو۔ کمشنر لسبیلہ ءِ مانیٹرنگ افسر پارے کہ ہرا وخت نن بھرتی مسن نن ورنا ئسن، اینو ننا زیات انا وئی 40 سال آن گدرینگانے‘ و داسہ ننے پین سرکاری محکمہ سے ٹی اپلائی کننگ نا وارخواہی ہم رسینگ پننگ ءِ‘ نن تینا ورنائی، تینا جانجوڑی و تینا وخت ءِ دا ادارہ و صوبہ نا الس نا خذمت کن تسن۔