سعودی عرب، پاکستان و ترکیہ نا نیام اٹ تاریخی اسیجائی دفاعی معاہدہ پک مس

مکہ مکرمہ، مکہ مکرمہ ٹی سعودی عرب، پاکستان و ترکیہ نا نیام اٹ تاریخی اسیجائی دفاعی معاہدہ پک مسنے، ہرانا مسخت ہر مسٹ آ ملک آتا جم سلامتی ءِ سوگو کننگ و ڈیہہ نا امن و سوگوی ءِ شون تننگ ءِ‘ وزیراعظم شہباز شریف، سعودی ولی عہد محمد بن سلمان و ترک صدر رجب طیب اردگان اسیجائی دفاعی معاہدہ غا دستخط کریر۔ معاہدہ نا رِد اٹ اسہ ملک اسے آ سلہہ بند جلہو ہر مسٹ آ ملک آتیا جلہو تکنگک، وخت اس کہ سعودی عرب، پاکستان و ترکیہ ہر وڑ انا بیداد نا برخلاف تینا جم دفاعی لائخی تے سوگو کننگ آ امنا ہم کرینو۔ ترجمان دفتر خارجہ طاہر اندرابی پارینے کہ خادم الحرمین الشریفین شاہ سلمان بن عبدالعزیز نا سلہ خلنگ آ صدر ترکیہ رجب طیب اردگان و وزیراعظم پاکستان محمد شہباز شریف سعودی عرب نا دورہ ءِ کریر، ہراڑے سعودی ولی عہد و وزیراعظم شہزادہ محمد بن سلمان ہڑتوم آ سرکڑدہ غاتے بخیر کرے۔ مکہ مکرمہ نا الصفاء محل اٹی سعودی عرب، پاکستان و ترکیہ نا اسیجائی دفاعی سروکی دیوان اڈ ہلک، ہراٹی ہر مسٹ آ ملک آتا تین پہ تینی تعلقداری، اسیجائی اسٹریٹجک فائدہ و تین پہ تینی استخواہی نا باندات آتا جاچ ءِ ہلنگا۔ ترجمان نا رِد اٹ دیوان اٹی سعودی عرب، پاکستان و ترکیہ نا نیام اٹی تاریخی، ایلمی و اسلامی یکجہتی نا تعلقداری تے پین شون تننگ آ امنا کننگا، وخت اس کہ ہر مسٹ آ ملک آک تینا دفاعی کمکاری و اسیجائی اسٹریٹجک فائدہ غاتے پین سوگو جوڑ کننگ نا عزم انا درشانی ءِ کریر۔ ترجمان دفتر خارجہ پارے کہ معاہدہ نا رِد اٹ ہر مسٹ آ ملک آتا نیام اٹی دفاعی کمکاری نا کل بشخ آتے پین ودفنگک۔ دا معاہدہ ہرمسٹ آ ریاست آتا اسیجائی دفاعی فائدہ و سلامتی نا رکھ اکن اہم ءُ پیش رفت اسے۔ ترجمان نا رِد اٹ مکہ مکرمہ ٹی مروک آ دیوان آن سعودی عرب، پاکستان و ترکیہ نا نیام اٹی دفاعی شریداری نا پوسکن ءُ دور اسے نا بنا مسنے۔ معاہدہ رکھوک و شونہال آخبت کن ہرمسٹ آ ملک آتا اسیجائی وژن نا ڈیک ءِ۔ ہرمسٹ آ ملک آک ڈیہہ و دنیا ٹی امن، سلامتی و سوگوی نا شون انا عزم انا دوارگی ءِ ہم کریر۔ترجمان دفتر خارجہ نارداٹ اسیجائی دفاعی معاہدہ ہر مسٹ آ ملک آتا تاریخی تعلقداری و اسٹریٹجک کمکاری نا بنداو آ پک مسنے۔