مسڑ طالب علم آک تعلیم، خواری و ضبط ءِ تینا زند انا مسخت جوڑ کیر،مولانا ہدایت الرحمن بلوچ

سربندن، صوبائی اسمبلی نا باسک مولانا ہدایت الرحمن بلوچ پارینے کہ مسڑ طالب علم آک تعلیم، خواری و نظم و ضبط ءِ تینا زند انا مسخت جوڑ کیر و استاد آتا راہشونی آن فائدہ ہرفسا آخبت اٹی تینا علاقہ، صوبہ و ملک انا شونداری اٹی بھرمی کڑد ادا کیر، او استاد آتیا زور شاغا کہ او خواری‘ سِخت و زمواری نا احساس اٹ مسڑطالب علم آتا تعلیم و ہیلکاری آ خصوصی چکار کیر، دا خیال آتا درشانی ءِ او گورنمنٹ گرلز انٹر کالج سربندن اٹی مسڑ طالب علم آتا شرف اٹی اڈ ہلوک بخیری دود آن تران کرسا کرے، دا وخت آ او مسڑ طالب علم آتیکن اسہ ہفتہ ٹی کمپیوٹر فراوان کننگ، یونیفارم کن نغد کمک تننگ و کتاب آتا فراوانی کن المی بست و بند کننگ نا پڑو ہم کرے، صوبائی اسمبلی نا باسک پارے کہ مر انگا علاقہ غاتا مسڑ طالب علم آتے آب اٹو تعلیم نا وارخواہی فراوان کننگ وخت نا اہم ءُ گرج اسے، دا مسخت کن تعلیمی ادارہ غاتے درکار آسراتی تا فراوانی و مسڑ طالب علم آتا ویل آتا ایسری کن ہر وڑ انا کمک فراوان کننگک۔ دود انا بنا تلاوت کلام پاک آن مس، اوکان گڈ طالب علم آتا کنڈآن حمد و نعت پیش کننگا، دود انا مہمانداری و چندی پروگرام آتے ٹی مسڑ طالب علم آک بشخ ہلکر۔ وخت اس کہ مسڑ طالب علم آک تیان تران تے ٹی تعلیم نا اہمیت، زالبول تا تعلیم و راج انا شونداری ٹی خوانندہ زالبول آتا کڑد آ تینا خیال آتا درشانی ءِ کریر، دا وخت آ مسڑ طالب علم آک سربندن کون آ مر انگا علاقہ ٹی گرلز انٹر جوڑ کننگ ءِ مسن تیکن بڑزکو تعلیم نا دوئی کننگ نا کنڈ آ اہم ءُ پیشرفت اس گوندار و کالج نا جوڑ کننگ‘ ویل آتا ایسری و المی آسراتی تا فراوانی ٹی مولانا ہدایت الرحمن بلوچ نا استخواہی و عملی گام گیج آتا ستاءِ کریر‘ کالج نا پرنسپل تران کرسا خاص انگا مہمان و ایلو شرفمند آ مہمان تا منتواری ءِ ہرفے۔