پاک چین سفارتی تعلقداریک تین پہ تینی پت‘ شرف وکمکاری نا شانی ءُ کسہ اسے ءُ، سیدال خان ناصر

اسلام آباد، ڈپٹی چیئرمین سینیٹ سیدال خان ناصر پارینے کہ پاکستان و چین نا سفارتی تعلقداریک بیرہ 75 سال انا سفارتی سفر اف بلکہ تین پہ تینی پت‘ شرف‘ کمکاری و آزمائشت نا ہر ساہت اٹی اسہ ایلو نا سیبو مننگ نا شانی ءُ کسہ اسے ءُ، 21 مئی 1951ء آ جوڑ مروک پاک چین سفارتی تعلقداریک وخت اتون اوار سوگو، و مچ آ بشخ آتیٹی اواری اٹی بدل مسنو، دا خیال آتا درشانی ءِ او پاکستان و چین نا سفارتی تعلقداری تا 75 می سال دے آ Diplomatic Focus نا کنڈآن اڈ ہلوک دود آن تران کرسا کرے، دود اٹی چین نا سفیر، سفارتکار، پارلیمان ناباسک، دانشور، میڈیا نمائندہ و ایلو اہم شخصیت آک بشخ ہلکر، ڈپٹی چیئرمین سینیٹ Diplomatic Focus نا چیف ایگزیکٹو آفیسر میاں فضل الٰہی نا دود انا اڈ تننگ و اودے بشخ ہلنگ نا سلہ خلنگ آ منتواری ءِ ہرفے، او پارے کہ تدوک آ مسہ نیم نیم عشرہ ٹی جہانی و ڈیہہ اٹی حالیت آتیٹی نمان بدلی بس، ولے پاکستان و چین انا تعلقداری تیٹی پدریسہ و سوگوی برجا سلیس‘ ہڑتوم آ ملک آک اسہ ایلو نا وتواجہی، قومی فائدہ و شونداری نا حق انا شرف ءِ کریر و سختی نا وخت آتیٹی اسہ ایلو تون اوار سلوک ئسر، او پارے کہ پاکستان و چین نا تعلقداریک داسہ بیرہ حکومت و ریاستی ادارہ غاتسکان کچ اٹ افس بلکہ ہڑتوم آ ملک آتا الس نا نیام اٹی مہر، پتداری و خیرسگالی دا رشتہ ءِ پین سوگو ءُ بنداو اس فراوان کرینے، واپاری‘ زرکاری، تعلیم، کشت وکشار، جانجوڑی، سائنس و ٹیکنالوجی، توانائی، بنداوی پنجر و السی رابطہ غاتیا تالان چندی بشخ آتیٹی ہڑتوم آ کنڈ آن کمکاری نا وارخواہیک ساڑی ءُ، سیدال خان ناصر پارے کہ چین پاکستان اقتصادی راہداری (CPEC) پاک چین اواری نا اہم ءُ درور اسے، ہرا رابطہ کاری، توانائی، بنداوی پنجر و صنعتی کمکاری نا پوسکن وارخواہی ودی کرے او پارے کہ آخبت اٹی دا کمکاری ءِ پین ودفسا صنعت، کشار، پوسکنوڑ آ ٹیکنالوجی، زرکاری و روزگار نا پوسکن آ وارخواہی تا ودی کننگ آ چکار کننگ نا گرج ِ‘ ڈپٹی چیئرمین سینیٹ پاک چین تعلقدار آتیٹی پارلیمانی و السی سفارت کاری نا اہمیت ءِ پیدوار کرسا پارے کہ پارلیمان آک بیرہ کانود سازی نا ادارہ افس بلکہ الس نا جوزہ‘ استخواہی تا نمائندہ مریرہ، ہڑتوم آ ملک آتا پارلیمانی ڈَل آتا ہن وبر تین پہ تینی اوڑدہی و رابطہ غاک اسہ ایلو ءِ سرپند مننگ و ہڑتوم آ کنڈ آن کمکاری ءِ ین شون تننگ اٹی اہم کڑد ادا کیرہ۔