ڈپٹی کمشنر حب جمعہ داد خان مندوخیل نا کماشی ٹی ریونیو باندات آتیا اہم ءُ دیوان اس اڈ ہلک

حب، ڈپٹی کمشنر حب جمعہ داد خان مندوخیل نا کماشی ٹی ریونیو باندات نا بابت اسہ اہم ءُ دیوان اس ڈپٹی کمشنر آفس حب اٹی اڈ ہلک۔ دیوان اٹی ایکسین محکمہ آبپاشی و نہری نظام، ضلع حب انا کل اسسٹنٹ کمشنر آک، تحصیلدار، نائب تحصیلدار و محکمہ ریونیو نا تعلقدار افسر و کارندہ غاک بشخ ہلکر۔ دیوان اٹی ضلع حب اٹی ریونیو نا باندات، سرکاری بُنگ انا ہلنگ‘ الس ءِ ریونیو آسراتی تا فراوانی، پرائس کنٹرول، ڈغار تا ویلیوایشن ٹیبل نا جوڑ جاڑ و ایلو انتظامی باندات آتا جم جاچ ءِ ہلنگا۔ دیوان نا وخت آ عشر، آبیانہ و کشاری انکم ٹیکس (اے آئی ٹی) تون اوار جتا جتا سرکاری بُنگ ہلنگ نا جاچ ءِ ہلسا ڈپٹی کمشنر حب تعلقدار افسر آتے پارت کرے کہ پک کروک ریونیو ہدف نا دوئی کننگ کن بھرمی سُج پام اس تینائی کننگے و سلوک زرتس ہلنگ نا عمل ءِ پین ترند کننگے۔ او پارے کہ سرکاری بنگ انا وخت آ وشفاف وڑ اٹ حکومت نا زرگزرانی نظام نا اہم ءُ بشخ اسے، ہندا سوب آن کل تعلقدار افسر آک تینا زمواری تے پورو دیانتداری و زمواری تون سر تننگ کیر۔ او ریونیو ریکارڈ ءِ پورو و اپ ڈیٹ تخنگ و زرتس نا عمل اٹی شفافیت ءِ پک کننگ نا ہم پارت کرے۔