صوبائی وزیر داخلہ نا کوئٹہ شار نا اناگت دورہ،، شاریک منفی پروپیگنڈا غا خف توروک مفس، میر ضیا اللہ لانگو

کوئٹہ، صوبائی وزیر داخلہ بلوچستان میر ضیا اللہ لانگو معاون برائے داخلہ بابر یوسفزئی نا ہمراہی ٹی کوئٹہ شار نا اناگت دورہ ءِ کرے، ہراڑے او جتا جتا اہم آ شاہراہ، بازار و تجارتی ہند آتا معائنہ ءِ کرسا امن و امان، سیکیورٹی بست و بند و شاری سرجز آتا جم جاچ ءِ ہلک۔ دورہ نا وخت آ صوبائی وزیر داخلہ و معاون برائے داخلہ لیاقت بازار، قندھاری بازار، پرنس روڈ، زرغون روڈ، سریاب روڈ، بروری روڈ، گاہی چوک، جوائنٹ روڈ شار نا جتا جتا علاقہ غاتا تفصیلی دورہ ءِ کریر۔ دا موقع آ او سیکیورٹی کارندہ غاتا تعیناتی، ٹریفک نا روانی، بازار آتا حالیت و السی سرجز آتا جاچ ءِ ہلکر۔میر ضیا اللہ لانگو شاری، تاجر و دکاندار آتون اوڑدہی ہم کرے و اوفتیان شار نا حالیت، کاروباری سرجز و سیکیورٹی انتظامات نا بابت معلومداری ہلک۔ شاری و تاجر برادری حکومت نا کنڈ آن ہرفوک آ سیکیورٹی گام گیج آتا ستا ءِ کرسا است جمی نا درشانی ءِ کریر۔ صوبائی وزیر داخلہ پارے کہ کوئٹہ شار اٹی امن و امان نا حالیت پورو وڑ اٹ معمول نا رِد اٹ اے، ُ۔ او پارے کہ شار اٹی ٹریفک معمول نا رِد اٹ برجا اے و کس ءُ ہند اسے آ کس ءُ کسر اس بند اف۔