مکہ مکرمہ دفاعی معاہدہ امن، سلامتی و سوگوی کن اہم ءُ پیشرفت اسے،وزیراعلیٰ میر سرفراز بگٹی

کوئٹہ، وزیراعلیٰ بلوچستان میر سرفراز بگٹی مکہ مکرمہ ٹی پاکستان، سعودی عرب و ترکیہ نا نیام اٹ مروک آ اسیجائی دفاعی معاہدہ نا ستاءِ کرسا اودے ڈیہہ اٹی امن، سلامتی و سوگوی کن تاریخی و اہم ءُ پیشرفت اس گوندا۔ وزیراعلیٰ پارے کہ مکہ مکرمہ ٹی پک کروک دا تاریخی معاہدہ مسہ ایلم ملک آتا نیام اٹ تین پہ تینی پتداری، کمکاری و اسیجائی دفاعی لائخی تے پین سوگو کننگ نا کنڈ آ اہم ءُ گام اسے۔ پاکستان، سعودی عرب و ترکیہ نا نیام اٹ سوگو ایلمی تعلقداری ڈیہہ اٹی امن و سوگوی کن مدام اہم مسنے۔ میر سرفراز بگٹی پارے کہ اسیجائی دفاعی معاہدہ ہر مسٹ آ ملک آتا رکھوک، سوگو و شونہال آخبت نا اسیجائی عزم انا ڈیک اے۔ دا معاہدہ نئے بیرہ دفاعی کمکاری ءِ پوسکن ءُ دروشم اس ایتک بلکن ہرمسٹ آ ملک آتا نیام اٹی اسٹریٹجک شریداری ءِ ہم پین سوگو کیک۔ وزیراعلیٰ بلوچستان پارے کہ پاکستان و سعودی عرب نا تعلقداری تاریخی، ایلمی و تین پہ تینی شرف آ تالان ءِ‘ وخت اس کہ ترکیہ ہم پاکستان نا پتدار سنگت و ایلم ملک اسے۔ ہرمسٹ آ ملک آتا خڑک کمکاری مسلم دنیا ٹی تین پہ تینی یکجہتی، کمک و اسیجائی فائدہ غاتا شون نا سوب مریک‘ او پارے کہ دا اہم آ معاہدہ ءِ پک کننگ اٹی وزیراعظم پاکستان و فیلڈ مارشل نا کڑد ستا کڑزک، ہرافک قومی فائدہ غاتے و ڈیہہ نا امن و سلامتی کن دا اہم انگا پیشرفت ءِ مونی دریر۔ میر سرفراز بگٹی دعا کرے کہ اللہ تعالیٰ مکہ مکرمہ ٹی مروک آ دا تاریخی معاہدہ ءِ پاکستان، سعودی عرب، ترکیہ و مچ آ مسلم امہ کن خیر و برکت نا سوب جوڑ کے و مسہ ایلم ملک ءِ امن، سوگوی، شون و شونہالی نا پوسکن آ مزل آ سر کے۔ او پارے کہ پاکستان مدام ڈیہہ و دنیا ٹی مدامگی امن، تین پہ تینی شرف، وتواجہی و کمکاری کن تینا مثبت کڑد ءِ ادا کرسا کیک۔