آزاد کشمیر گچین کاری، مسلم لیگ کٹانے، السی مینڈیٹ ءِ شرف تننگے،رانا ثناء اللہ

وزیراعظم نا سلاہکار سیاسی باندات رانا ثناء اللہ پارینے کہ آزاد جموں و کشمیر قانون ساز اسمبلی نا گچین کاری تا ارٹمیکو ریسہ غان پد پاکستان مسلم لیگ (ن) 23 نشست آتیا سرسہبی دوئی کرسا سادہ گیشتری نا پوزیشن اٹی بسنے۔ گچین کاری تے آجو‘ انصاف اٹ و شفاف گوندسا او پارے کہ الس نا مینڈیٹ نا شرف ءِ کرسا آزاد کشمیر اٹی پیدوار گیشتری حکومت جوڑ مریک ہرا شونداری و شونہالی نا پوسکن ءُ دور اسے نا بناءِ کیک۔ پریس کانفرنس آن تران کرسا رانا ثناء اللہ پارے کہ آزاد کشمیر نا 20 حلقہ ٹی گچین کاری ریسہ پرامن وڑ اٹ پورو مس، وخت اس کہ جم وڑ اٹ مسلم لیگ (ن) 23 نشست آتیا سرسہبی دوئی کرے۔ او پارے کہ میرپور ڈویژن نا 13 نشست آتیا مسلم لیگ (ن) سرسہب مس وخت اس کہ مظفرآباد ڈویژن نا 7 نشست آتیان 4 آ مسلم لیگ (ن) و 3 آ پاکستان پیپلز پارٹی نا اومیتدار آک سرسہب مسر۔ ہندا وڑ مہاجر آتا 12 مخصوص نشست آتیان 10 آ مسلم لیگ (ن) و 2 آ پیپلز پارٹی سرسہبی دوئی کرے۔ رانا ثناء اللہ پارے کہ پاکستان پیپلز پارٹی میرپور ڈویژن اٹی با تننگ آن پد دھاندلی نا بیانیہ تینائی کرے، ولے شاہدی خواہنگ آ اوفتا دعویٰ اول 13 حلقہ غان کم مرسا 4، ولدا بیرہ 2 حلقہ غاتسکان سلیس۔ او پارے کہ آزاد کشمیر اٹی پورو وڑ اٹ فری اینڈ فیئر گچین کاری اڈ ہلک و کل سیاسی جماعت آتے بریبر وارخواہی فراوان کننگا۔ او پارے کہ سرسہب اومیتدار آتتون اوار گچین کاری ٹی بشخ ہلوک کل اومیتدار آک مبارکبادی نا حقدار ءُ انتئے کہ او جمہوری ریسہ ءِ سوگو کننگ اٹی کڑد ادا کریر۔ او پارے کہ السی مینڈیٹ نا رِد اٹ آزاد کشمیر اٹی مسلم لیگ (ن) نا گیشتری حکومت جوڑ مریک‘ ہرا میاں محمد نواز شریف نا قول تا رد اٹ الس تون کروک شونداری و آسودہی قول تے پورو کیک۔ رانا ثناء اللہ مستی پارے کہ گچین کاری تا گڈیکو ریسہ نا دمدستی پد مسلم لیگ (ن) نا اہم ءُ دیوان اس اڈ ہلیک، ہراٹی بروک آ حکومت جوڑ کننگ و سیاسی سج پام آ سجفنگک۔ او گچین کاری سرسہبی آ پارٹی کارندہ، ووٹر و تنظیمی عہدیدار آتا منتواری ہم ہرفے۔