ورنا تا تکنیکی کمکاری کن،چیف منسٹر یوتھ ایمپلائمنٹ پروگرام نا رد اٹ تاریخی گام انا بنا

بلوچستان نا ورناتے پوسکنوڑ تکنیکی علم آن شُپ کننگ و اوفتے روزگار نا مدامگی وارخواہی فراوان کننگ کن وزیراعلیٰ بلوچستان میر سرفراز بگٹی چیف منسٹر یوتھ ایمپلائمنٹ پروگرام نا رِد اٹ اسہ تاریخی و جوان ءُ گام اسے نا بناءِ کرینے۔ دا پروگرام نا رِد اٹ مچ آ صوبہ نا ہزار لائخ آ ورناتے پاکستان نا پنی آ سافٹ ویئر ہاؤسز اٹی عملی ہیلکاری و باقاعدہ روزگار فراوان کننگک۔ بی ٹیوٹا و کیو ٹیک نا اسیجائی کوشست دا فلیگ شپ پروگرام بلوچستان ٹیکنیکل ایجوکیشن اینڈ ووکیشنل ٹریننگ اتھارٹی (B-TEVTA) نا چاروکی ٹی کیو ٹیک (Q-Tech) نا اواری اٹ پورو کننگ انگ ءِ‘ پروگرام نا شفاف اڈ تننگ کن آن لائن پورٹل نا کمک اٹ درخواست آک ہلنگاسر۔ ہراکان پد داسہ عملدرآمد نا بروک آ ریسہ نا باقاعدہ بنا مسنے۔ شفافیت و میرٹ ءِ پک کننگ کن تدوک آ مسہ دے آن بلوچستان نا کل ضلع غاتیان بروک آ ہزار آ طالب علم آتا شارٹ لسٹنگ ٹیسٹ و انٹرویوک برجا ءُ۔ صوبہ نا مُر انگا ضلع غاتیان تعلقدار ورنا تا بھلا کچ اٹی بشخ ہلنگ دا ہیت انا شاہدی اے کہ صوبہ ٹی تکنیکی بشخ انا کنڈ آ است خواہی ٹی ودکی مننگ اٹی ءِ۔ دا جتا و انقلابی پروگرام نا کل آن اہم آ خاصیت دادے کہ گچین مروک آ کل ورنا تا ہیلکاری، ہنکین و ایلو کل خڑچ آتے حکومت بلوچستان، بی ٹیوٹا نا کمک اٹ کننگرہ۔ ورنا تیا ہچ ءُ وڑ اسے نا مالی باریم شاغنگ مفک تانکہ او پورو چکار ءِ تینا ہنر مندی و روزگار آ تخنگ کیر۔ صوبہ نا کل ضلع غاتیان بروک آ طالب علم و اوفتا خاہوت آک وزیراعلیٰ بلوچستان میر سرفراز بگٹی نا دا روشن خیال و روزگار دوست گام اناستاءِ کرینو۔ ورناک پارینو کہ آئی ٹی (IT) نا بشخ اٹی دا وڑ انا کسبی ہیلکاری آن نئے بیرہ بلوچستان نا ٹیلنٹ قومی و جہانی کہول آ مون آ بریک بلکن صوبہ ٹی بے روزگاری نا چٹفنگ اٹ ہم مزل نا نشان اس مریک۔