وزیراعلیٰ نا کماشی ٹی جشنِ آزادی نا دود آتا تیاری تا بابت دیوان

وزیراعلیٰ بلوچستان میر سرفراز بگٹی نا کماشی ٹی جشنِ آزادی نا دود آتا تیاری نا بابت اسہ بڑزکو کہولی دیوان اس اڈ ہلک ہراٹی کور کمانڈر بلوچستان لیفٹیننٹ جنرل راحت نسیم احمد خان خصوصی وڑ اٹ بشخ ہلک۔ دیوان اٹی مچ آ صوبہ ٹی یومِ آزادی نا دود آتے قومی جوزہ، نظم و ضبط و پورو جوش و جوزہ اٹ اڈ تننگ کن جامع سج پام و بست وبند آتا سرجم جاچ ءِ ہلنگا۔ دیوان اٹی فیصلہ کننگا کہ بلوچستان نا کل ڈویژنل و ضلعی ہیڈ کوارٹر آتے ٹی جشنِ آزادی نا دود آک گچین وڑ اٹ اڈ تننگرہ، ہرافتیٹی قومی بیرک چست کننگ‘ ملی نغمہ، ربیدگی، تعلیمی و السی پروگرام تون اوار دود اڈ تننگک تانکہ الس خاص وڑ اٹ ورنا چین اٹی حب الوطنی و قومی یکجہتی نا جوزہ ءِ پین شون تننگ مرے۔ وزیراعلیٰ میر سرفراز بگٹی کل کمشنر، ڈپٹی کمشنر و تعلقدار ادارہ غاتے پارت کرے کہ جشنِ آزادی نا دود آتے منظم، باوقار و مدام یات تخوک کننگ کن کل بست وبند آتے وخت آ پک دروشم تننگے۔