حکومت برآمدی و ہندی بشخ ءِ وس انا کچ آ آسراتی فراوان کرسا کیک،وزیراعظم محمد شہباز شریف

وزیراعظم محمد شہباز شریف چندی بشخ آتیٹی خراج نا کچ انا کساس کن جوان و سائنٹیفک وڑوڈول اس جوڑ کننگ نا پارت کرسا پارینے کہ حکومت برآمدی و ہندی بشخ ءِ وس انا کچ آ آسراتی فراوان کرسا کیک۔ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم محمد شہباز شریف نا کماشی ٹی ایف بی آر اصلاحات آ ہفتہ وار جاچ دیوان چارشنبے نادے آ اڈ ہلک، ہراٹی بنگ اٹ ودکی و ادارہ ئی اصلاحات آ پیش رفت نا سرجمی اٹ جاچ ءِ ہلنگا۔ وزیراعظم دیوان آن تران کرسا پارت کرے کہ چندی بشخ آتے ٹی خراج نا کچ انا کساس کن اسہ جوان و سائنٹیفک وڑوڈول اس جوڑ کرسا پیش کننگے۔ او پاور سیکٹر تون کمکاری اٹ غیر رسمی زرگزرانی سرجزو خراج دُزی ٹی اوار بندغ و کاروبار آتے پک کرسا اوفتا برخلاف کانودی کارروائی نا ہم پارت کرے۔ وزیراعظم پارے کہ پاکستان نا تاریخ اٹی اولیکو وار بورہ نا پیداواری بشخ و ایف بی آر نا حساب وکتاب اٹ ہم گرنچی دا ہیت انا پیدوار شاہدی ءِ کہ ایف بی آر نا کنڈ آن اتوک آ ٹریکنگ سسٹم فعال و گچین کارکڑد نشان تننگ ءِ۔ دا بابت چیئرمین ایف بی آر و اونا ٹیم انا کوشست آک ستا کڑزرہ۔ وزیراعظم خراج نا نظام اٹ سلسا کل ضابطہ غاتا پابندی کننگ و خراج جمع کرفوک آبندغ و کاروبار آتا ستاءِ کرسا پارے کہ او ملک و قوم انا نہادی میرات ءُ۔ او پارے کہ حکومت خراج نا بابت برآمدی و ہندی بشخ آتے اخہ در مننگ کرے آسودہی فراوان کرے و آخبت کن ہم کرسا کیک۔ وزیراعظم پارت کرے کہ چیئرمین ایف بی آر و سینئر افسر ہر تُو انا اولیکو ہفتہ کراچی ٹی ساڑی مریر تانکہ کاروباری برادری نا ویل آتے وخت آ بننگ و ایسر کننگ مرے۔ او ٹیکسٹائل، شربت، اسٹیل، پولٹری، کنوئی آ تیل و سی و ٹیر تا بشخ آتے ٹی پیداوار نا ڈیجیٹل چاروکی نا نظام ءِ دسمبر اسکان فعال جوڑ کننگ نا ہم پارت کرے۔ وزیراعظم پارے کہ ایف بی آر اٹی تقرری و تبادلہ بیرہ میرٹ نا بنداو آ کننگک۔ او ایف بی آر اٹی افسر آتا جاچ انا نظام ءِ ستاکڑزوک گوندا وپارے کہ میرٹ و شفافیت اولی اولیت مریک۔ او پارت کرے کہ گچین کارکڑد تروک افسر آتا لڑ ءِ جوڑ کننگے تانکہ یوم آزادی آ اوفتا ایوارڈ اٹ ستاءِ کننگ مرے۔ وزیراعظم کسٹمز بانڈڈ ویئر ہاؤسز اٹی ہروڑ انا بے ڈولی نا پیدواری و توننگ کن دمدستی تھرڈ پارٹی آڈٹ و ویلیڈیشن کرفنگ نا ہم پرمان کرے۔ وزیراعظم ءِ ایف بی آر نا کنڈ آن پیداواری بشخ اکن ٹریکنگ سسٹم نا خلنگ، ایف بی آر اٹی ہیومن ریسورس نا بابت نافذ کروک اصلاحات و آپریشنل کاریم نا کچ ءِ ودفنگ نا بابت حوال تننگا۔ دیوان ءِ پاننگا کہ بورہ، سرمٹ، تمباکو، ٹیل و کھد آتا بشخ اٹی ٹریکنگ سسٹم پورو وڑاٹ فعال، وخت اس کہ پین 5 بشخ آتے ٹی نفاذ گڈیکو ریسہ غاتیٹی ءُ ہرانا خراج کچ 700 ارب روپئی آن زیات ءِ۔ دیوان ءِ پاننگا کہ 9 پیداواری بشخ آتے ٹی ٹریکنگ سسٹم اس جوڑ کننگ و اونا نفاذ کن بشخ آتتون اواری اٹ کاریم برجاءِ ہرانا سوب آن 560 ارب روپئی نا خراج نا کاریم نا کچ آن فائدہ ہرفنگ مریک۔