بجلی و گیس انا فراوانی نا بابت ویل آتے ایسر کننگک‘ڈپٹی کمشنرکوئٹہ

کوئٹہ، ڈپٹی کمشنر کوئٹہ مہراللہ بادینی نا کماشی ٹی کوئٹہ شار اٹی بجلی و گیس انا فراوانی تون تعلقدار السی ویل آتا جاچ ءِ ہلنگ کن دیوان اس اڈ ہلک۔ دیوان اٹی ایڈیشنل ڈپٹی کمشنر (ریونیو)، ایکسین واپڈا، محکمہ گیس و سوئی سدرن گیس کمپنی (ایس ایس جی سی) نا افسر آتتون اوار اسسٹنٹ کمشنر سریاب بشخ ہلک۔ دیوان اٹی مچ آ شار اٹی بجلی نا لوڈشیڈنگ، بجلی نا فراوانی ٹی مون تروک ویل، گیس پریشر اٹی کمتی، گیس انا فراوانی نا وخت وپاس‘ وولٹیج نا ویل و ایلو انتظامی باندات آ جم گپ وتران کننگا۔ دا وخت آ ڈپٹی کمشنر کوئٹہ مہراللہ بادینی تعلقدار محکمہ غاتا افسر آتے پارت کرے کہ الس ءِ بجلی و گیس انا فراوانی تون تعلقدار مون تروک ویل آتا ایسری کن گچین گام گیج کننگے۔ او پیدوار کرے کہ ہراڑے ہم بجلی و گیس انا فراوانی نا بابت ویل آک مون آبریر ہموڑے ضلعی انتظامیہ تعلقدار محکمہ غاتتون پبی کمک کیک تاکہ السی مشکل آتا وخت آ ایسری ءِ پک کننگ مرے۔