بلوچستان حکومت السی آسراتی و آسودہی نا ایجنڈا غا سنجیدہ ئی اٹ کاریم کننگ ءِ،وزیر اعلیٰ میر سرفراز بگٹی

وزیراعلیٰ بلوچستان میر سرفراز بگٹی نا کماشی ٹی صوبائی کابینہ نا اسہ اہم ءُ دیوان اس چارشنبے نا دے چیف منسٹر سیکرٹریٹ اٹی اڈ ہلک، ہراٹی السی آسودہی، امن و ایمنی‘ تعلیم، بلدیاتی نظام، شونداری ڈٹ و انتظامی باندات آتتون تعلقدار کیہی اہم فیصلہ غاتا منظوری تننگا۔ دیوان نا بنا ٹی جتا جتا واقعہ غاتیٹی شہید مروک سیکورٹی فورس آتا افسر و کارندہ و سویلین شہید آتا درجہ غاتا بڑزی‘ مغفرت و پدخاہوت نا صبرِ اکن دعا کننگا۔ صوبائی کابینہ پوریاگر تپہ نا چناتے آب اٹو تعلیمی وارخواہی فراوان کننگ کن چیف منسٹر اسکالرشپ پروگرام نا فیز تھری نا منظوری ءِ تس، ہرانا رِد اٹ بلوچستان نا رجسٹرڈ خواری کش آتا 300 چناءِ اسلام آباد نا آب اٹنگا بورڈنگ اسکول آتیٹی داخلہ تننگک تانکہ اوفتے بڑزکو آب انا تعلیم و جوان آخبت نا وارخواہی دوئی مرے۔ بلدیاتی ادارہ غاتے پین فعال کننگ کن کابینہ یونین کونسل میسی زئی و و یونین کونسل میزئی ءِ میونسپل کمیٹی نا درجہ تننگ وخت اس کہ گلستان اٹی پوسکن میونسپل کمیٹی جوڑ کننگ نا منظوری تس۔ امن و ایمنی نا نظام ءِ پین سوگو و بھرمی جوڑ کننگ کن صوبائی کابینہ لیویز فورس نا پولیس اٹی اواری آن پد مچ آ صوبہ ءِ باقاعدہ پولیس ایریا گوندنگ نا منظوری تس۔ کابینہ ایس پی نبیل احمد ءِ بلوچستان سیف سٹی اتھارٹی نا چیف آپریٹنگ افسر تعینات کننگ نا ہم منظوری تس، وخت اس کہ ہوم ڈیپارٹمنٹ نا سلاہ تا رِد اٹ پیرول بورڈ جوڑ کننگ نا منظوری ہم تننگا۔ کابینہ ضلع حب انا ماربل سٹی نا ہند آ پوسکن پولیس اسٹیشن جوڑ کننگ نا منظوری ہم تس تانکہ صنعتی و واپاری سرجز آتا رکھ و کانود نافذ کروک نظام ءِ پین بھرمی جوڑ کننگ مرے۔ دیوان اٹی صوبہ ٹی شونداری ڈٹ آتا جوان ڈٹ بندی و عملدرآمد کن بلوچستان پلاننگ مینوئل نا منظوری تننگا۔ ہنداوڑ اٹ چناتا حق و رکھ انا نظام ءِ پین سوگو کننگ کن بلوچستان چائلڈ پروٹیکشن رولز 2026 انا منظوری ہم تننگا، ہرادے دا بشخ اٹی اسہ اہم ءُ پیش رفت اس گوندنگا۔ صوبائی کابینہ بلوچستان کیڈٹ کالجز ترمیمی ایکٹ 2026 انا منظوری ہم تس، وخت اس کہ محکمہ پراسیکیوشن نا سلاہ تا رد اٹ پراسیکیوٹر جنرل نا کنٹریکٹ ملازمت نا وخت اٹ پین اِرا سال انا ودکی نا منظوری تننگا۔ سرکاری خریداری نا نظام اٹی شفافیت، گوبر و بھرمی مالی نظم و نسق ءِ شون تننگ کن بلوچستان ہائبرڈ ویٹ پروکیورمنٹ پالیسی 2026 نا منظوری تننگا، وخت اس کہ کوئٹہ سیف سٹی پروجیکٹ نا سروس لیول ایگریمنٹ نا ہم منظوری تننگا تانکہ ڈٹ آ وخت آ و بھرمی عملدرآمد پک کننگ مرے۔ شونداری بشخ اٹی کابینہ ہرنائی۔ سبی روڈ انا فنانسنگ پروپوزل نا منظوری تس، وخت اس کہ گوادر ڈویلپمنٹ اتھارٹی نا گریڈ 1 آن 21 نا سروس رولز 2024 نا ہم منظوری تننگا، وخت اس کہ محکمہ ریونیو نا سلاہ تیا ضلع نصیرآباد اٹی پوسکن آ تحصیل و سب ڈویژن نا منظوری ہم تننگا۔