وزیر مذہبی باندات،بنجائی حکومت نا کنڈ آن چار سال آ تالان حج پالیسی نا پڑو

بنجائی حکومت چار سال آ تالان حج پالیسی نا پڑو کرے۔ پوسکن آ پالیسی نا رِد اٹ اولیکو وار رجسٹریشن و ویٹنگ لسٹ انا وڑ و ڈول، 10 درسَد زرتس نا بنائی درخواست، ڈیجیٹل مانیٹرنگ و غاو تا دمدستی ایسری نا نظام درستی راستی کرفنگ انگ ءِ‘ بنجائی وزیر مذہبی باندت سردار محمد یوسف پارے کہ دا پالیسی نا مسخت حج بست وبند آتے شفاف، پوسکنوڑ و جہانی آب انا رِد اٹ جوڑ کننگ ءِ۔ چارشنبے نا دے بنجائی وزیر مذہبی باندات سردار محمد یوسف چار سال آتالان حج پالیسی 2027 تا 2030 نا پڑو کرسا پارے کہ دا پاکستان نا تاریخ اٹی اولیکو وار اسہ مریس وختی حج پالیسی ءِ‘ ہرانا کمک اٹ بروک آ چار سال انا حج بست وبند آتے مدامگی، منظم و جہانی آب انا رِد اٹ کننگک۔ او پارے کہ دا پالیسی وزیراعظم شہباز شریف نا خاص پارت و سعودی ویژن 2030 نا وڑ اٹ تیار کننگانے۔ وزیر مذہبی باندات پارے کہ اولیکو وار رجسٹریشن و ویٹنگ لسٹ نا نظام درستی راستی کرفنگ انگ ءِ‘ ہرانا رِد اٹ حاجیک بیرہ 10 درسَد زر جمع کرسا تینا درخواست ءِ رجسٹر کرفنگ کیرہ۔ دا نظام آن ہنکین‘ ٹرانسپورٹ، کنشت ایلو بست وبند آک مسٹ آن چار سال مہالو جوان وڑ اٹ پورو کننگرہ۔ او پارے کہ سرکاری و پرائیویٹ حج اسکیم نا کوٹہ مست آنبار 60 و 40 درسَد مریک‘ وخت اس کہ پرائیویٹ حج کمپنی تا رجسٹریشن، چاروکی و ودکی کوٹہ بیرہ اوفتا کارکڑد نا بنداو آ تننگک۔ کل خریداری پاکستان و سعودی عرب اٹی شفاف وڑ اٹ مریک و زرتس آن پد اگہ گڑاس زر بچار تو اوفتے حاجی تے پدی تننگک۔ سردار محمد یوسف نا رِد اٹ حج خڑچ آک بنائی وڑ اٹ 12 آن 13 لکھ روپئی تخنگانو۔ ولے پک خڑچ آتے ٹی حالیت آتا رِد اٹ کمتی یا ودکی مننگ کیک۔ پاکستان نا جم حج کوٹہ اسہ لکھ 79 ہزار 210 برجا تخنگانے وخت اس کہ حجاج محافظ اسکیم ہم آخبت اٹی برجا سلک۔ او پارے کہ حاجی تا غاو تا دمدستی ایسری کن پوسکنوڑ ڈیجیٹل نظام و باقاعدہ خواست انا وڑوڈول درستی راستی کرفنگ انگ ءِ‘ وخت اس کہ حج ہیلکاری پروگرام ءِ ہم پین بھرمی کننگک تانکہ حاجی تے جوان آسراتی و شرفدار ءُ سفر اس فراوان کننگ مرے۔