ایران نا اردن اٹ امریکی اڈہ غا بیلسٹک میزائل جلہو آتے پک کرے، پاسدارانِ انقلاب نا بیان

ایران اردن اٹ امریکی اڈہ غا میزائل جلہو آتے پک کرینے، امریکی فوج انا بنجائی کمان (سینٹکام) نا کنڈآن نیامی دے ٹک ٹی امریکی اڈہ غاتیا خلوک ایرانی میزائل آتے بھس کننگ نا پڑو آن منہ گھنٹہ پد ایران نا پاسدارانِ انقلاب اسہ بیان اسے ٹی دا جلہو آتے پک کرینے، بی بی سی نا رداٹ پاسدارانِ انقلاب نا کنڈآن جاری بیان اٹ پاننگانے کہ امریکی فوج انا جارح کارروائی تا ورندی ٹی پاسدارانِ انقلاب نا ایروسپیس فورس انا بہادر ورنا ک منہ گھنٹہ مست اردن اٹ ساڑی امریکی فوج انا فضائی اڈہ و بنجائی کمان نا ہند ءِ چندی بیلسٹک میزائل آتے اٹ شست کریر۔ تدوک آچار دے آن ایران و امریکہ نا نیام اٹ دراست جلہو آک توروک ئسر ولے چارشنبے نا سُہب انا سینٹکام تینا بیان اٹ دعویٰ کریسس کہ ایران اناگت جلہو نا کوشست کرے ولے امریکی فوج آک سنبرینگوک ئسر و خلوک آ کل میزائل آتے فضا ٹی بھس کریر۔ ایران نیامی دے ٹک اٹی امریکی فوج آتیا اناگت جلہو نا کوشست اٹی چندی بیلسٹک میزائل خلکنے ہراڑان ہڑتوم آ ملک آتا نیام اٹ جنگ اٹ بروک آ گونڈ وقفہ چٹانے۔ امریکی فوج انا رداٹ دا جلہو سے شنبے ا ٓامریکی دے ٹکی وخت انا رداٹ بیگہ نا پنچ بجہ و 45 منٹ آ کننگا (پاکستانی وخت انا رداٹ سے شنبے و چارشنبے نا نیامی نن دو بجہ و 45 منٹ)، ولے کل میزائل آتے سرسہبی اٹ بھس کننگا۔ امریکی فوج انا بنجائی کمان (سینٹکام) دا پاتو کہ جلہو نا ہدف ہرا جاگہ غاک ئسر۔ ایلو کنڈآ سینٹکام نا رداٹ امریکی و سعودی فوج آک عراق اٹ ایران نواز شدت پسند آتا ہند غاتے شست کریر۔ امریکی فوج پارینے کہ دا کارروائی ایران نا پاننگ آ کننگوک ڈرون جلہو آتا ورندی ٹی کننگا۔ ایرانی حکومت نا کنڈآن داسکان دا دعویٰ تیا ہچ ءُ تران اس کننگتنے۔ دا پوسکن آ چک وتاڑ امریکہ و ایران نا نیام اٹ ہندن ءُ چنکو وقفہ سے آن پد مون آ بسنو ہرا نا مسخت مذاکرات نا کسر ءِ آوار کننگ پاننگ انگ ئس۔ سینٹکام نا رداٹ امریکہ و سعودی عرب دے ٹکی عراق اٹ شدت پسند آتا چندی لاجسٹک و سلہہ ہند آتے شست کریر۔ امریکی فوج پارے کہ دا کارروائی گدرینگوک آ 72 گھنٹہ ٹی ایرانی پاسدارانِ انقلاب نا پاننگ آ کننگوک 30 آن زیات ڈرون جلہو آتا ورندی ٹی کننگا۔ سینٹکام خبڑدار کرے کہ ایرانی فوج و اونا پراکسی ٹولی تے دا وڑ انا جلہو آتے بند کروئی مریک، نہ تو امریکہ پین فوجی کارروائی کننگ کیک۔ گدرینگوک آ دے سعودی عرب ہم پڑو کریسس کہ اونا فوج ملک انا دے ٹکی بشخ اٹ تیل انا میرات آتے شست کروک ڈرون تے بھس کرے۔