پاکستان ءِ آبادی ٹی ودکی و موسمیاتی بدلی نا چیلنج آک مون تروک ءُ، بنجائی وزیر خزانہ

بنجائی وزیر خزانہ و بنگ سینیٹر محمد اورنگزیب پارینے کہ پاکستان ءِ ودوک آ آبادی و موسمیاتی بدلی کون آ بھلا چیلنج آک مون تروک ءُ، ہرافتتون مون تننگ کن حکومت اسہ جامع سج پام اسے آ عمل کننگ ءِ۔ سے شنبے نا دے آنیشنل ڈیزاسٹر مینجمنٹ اتھارٹی نا دورہ نا وخت آ او پارے کہ موسمیاتی بدلی نا منفی زہم تیان بچنگ و الس ءِ رکھ تننگ کن ورلڈ بینک انا کمکاری اٹ جتا جتا ڈٹ آتیا ترندی اٹ کاریم برجاءِ۔ او پارے کہ پاکستان ہمو ملک آتیٹی اوار ءِ ہرا موسمیاتی بدلی نا زہم تیان کل آن زیات زہمی مریرہ، حالانکہ جہانی گرین ہاؤس گیس آتا پیش کشنگ اٹ اونا کچ بھاز کم ءِ۔ دا سوب ءِ کہ حکومت جہانی شریدار آتا کمک اٹ موسمیاتی موافقت، قدرتی آفت آتتون مون تننگ نا لائخی ٹی ودکی، دیر انا گچین بست وبند، کشاری بشخ انا سوگوی و چاگڑد دوست شونداری نا ڈٹ آتیا خاص چکار کننگ ءِ۔ وزیر خزانہ پارے کہ موسمیاتی بدلی تون مون تننگ کن بیرہ حکومتی گام گیج آک گنج اس افس، بلکن السی سوج و اجتماعی زمواری ہم بھاز اہم ءِ۔ او پارے کہ شاری تیٹی چاگڑد نا رکھ، دیر انا احتیاط اٹ کاریم اٹ اتنگ، شجرکاری و قدرتی وسیلہ غاتا پامداری اٹ کاریم اٹ اتنگ نا بابت آگاہی ودی کننگ وخت انا اہم گرج ءِ تانکہ بروک آ چین تیکن اسہ رکھ و مدامگی چاگڑد اسے پک کننگ مرے۔ سینیٹر محمد اورنگزیب دا عزم انا درشانی ءِ کرے کہ حکومت ورلڈ بینک و ایلو شونداری شریدار آتا کمکاری اٹ ہمو ڈٹ آتے مون آ درسا کیک ہرا موسمیاتی بدلی نا خطرہ غاتیٹی کمتی، زرگزرانی سوگوی، چاگڑد دوست شونداری و الس نا راجی آسودہی اٹ کمکار مریر۔