کشمیر اٹ مروک وڑ تے جمہوریت نا پن تننگ مفک،بلاول بھٹوزرداری

چیئرمین پاکستان پیپلز پارٹی بلاول بھٹو زرداری مظفر آباد اٹی پارٹی کارندہ غاتیان تران کرسا پارے کہ کشمیر اٹی ہراوڑ مننگ اٹی ءِ اودے جمہوریت نا پن تننگ مفک، یونان نا سیوکا دانشور تاسیتوس نا ذکر ءِ کرسا پارے کہ “ظلم، بیدادی و کُشت و خون ءِ امن نا دروغ نا پن ترسا تالان کننگ انگ ءِ”۔ چیئرمین بلاول بھٹو زرداری تنقید کرے کہ میرپور اٹی پیپلز پارٹی نا وونٹ آ داڑیلی کننگ نا کوشست کننگا۔ او پارے کہ چوہدری یاسین اِرا سیٹ آتیا سلوک ئس و اودے سما ئس کہ پیپلز پارٹی ہڑتوم آ نشست آتے کٹک‘ ہندا سوب آن مستین نا گچین کاری تیانبار دا وار ہم وونٹ دُزی کننگ نا کوشست کننگا۔ او پارے کہ چوہدری یاسین نا 30 یونین کونسل آتیا مخالف آک کوزہ کریر و کیہی پولنگ اسٹیشن آتیان پولیس سلوک الو۔ او پارے کہ ننے پاننگاسس کہ ریسہ وڑ اٹ گچین کاری ہندا سوب آن کننگ انگ ءِ تانکہ سیکورٹی نا جوان بست و بند مرے، ولے داکان پد ہم پولنگ اسٹیشن آتیا دھاندلی کننگا۔ اوڑتون ویڈیو شاہدیک ہم اریر۔ او پارے کہ میرپور نا وونٹ آ داڑیلی کننگا و چوہدری یاسین نا وونٹ آ داڑیلی کننگا۔ او میرپور نا الس نا منتواری ہرفے و پارے کہ سخت انگا حالیت آتیان پد ہم الس پاکستان پیپلز پارٹی ءِ گیشتری وونٹ تس۔ او ملک ظفر، قاسم ندیم، یاسر سلطان و چوہدری یاسین نا سرسہبی آ مبارکبادی تس و پارے کہ الس چوہدری یاسین ءِ ہڑتوم آ نشست آتیا سرسہب کرینے۔ چیئرمین پی پی پی نکیال اٹی پاکستان پیپلز پارٹی نا جیالہ کارندہ مختار یونس نا شہادت نا ذکر ءِ کرسا پارے کہ سم کاری کرسا خلیس وبھیم انا حالیت جوڑ کننگ نا کوشست کننگا ولے دا کوشست بے سہب مس۔ او پارے کہ کشمیر نا چنا چنا ءِ سماءِ کہ کوٹلی ٹی پیپلز پارٹی نا گیشتری ءِ و ہرا وونٹ آتے دُزی کننگانے اودے پدی ہلنگک۔ او پارے کہ ریاست پاکستان ءِ فیصلہ کروئی ءِ کہ اوڑکن قومی فائدہ غاک اہم ءُ یا نون لیگ نا فائدہ غاک۔ او پارے کہ ریاست نا جاگہ غا جماعتی فائدہ ءِ اولیت تننگ آن نسخان ملک انا الس ءِ مننگ اٹی ءِ۔ نن چُپ کرسا دا راگ ءِ ہننگ کپنہ۔ نن ریاست تون اوار اُن و قومی فائدہ کن حکومت پاکستان تون سلوک اُن۔ او پارے کہ آزاد کشمیر ءِ مقبوضہ کشمیر جوڑ مننگ کن الیپنہ‘ اگہ ریاست سنجیدہ مسکہ تو آزاد کشمیر اٹی مہالو آجو و شفف گچین کاری کرفنگاکہ۔