امن ایمنی نا گچینی، شونداری ڈٹ آتا پوروی ءِ اولیت تننگک،کمانڈنٹ ایف سی پنجگور رائفلز

کمانڈنٹ ایف سی پنجگور رائفلز میجر جنرل ظفر اقبال اینو پنجگور نا سیاسی و راجی شخصیت، علاقہ نا متبر‘ عالم دین و جتا جتا تپہ غاتیان تعلقدار بندغ آتتون اڈ ہلوک اسہ دیوان اسے ٹی پنجگور نا امن وایمنی‘ شونداری ڈٹ آتا پوروی، تعلیمی ادارہ غاتا زیبائی وجوڑجاڑ‘ جانجوڑی ہند آتا آسراتی تا فراوانی تون اوار ایلو برجا شونداری ڈٹ آتیا سرجم ہیت و گپ کرے۔ دیوان اٹی پنجگور نا آل پارٹیز، عالم دین و ایلو سیاسی جماعت آتا سرکڑدہ غاک ساڑی ئسر ہرافتیٹی شاہ حسین آغا، حافظ محمد اعظم بلوچ، مولانا عبدالحلیم، ڈسٹرکٹ چیئرمین عبدالمالک صالح، اشرف ساگر، ملا فرہاد، اسداللہ بلوچ، فرید نواز، لعل دوست سردار سعود ساسولی، علی احمد شمبے زئی و ایلوفک اوار ئسر۔ دیوان اٹی شونداری ڈٹ و امن و ایمنی نا حالیت آتیا سرجم ہیت و گپ مس و دا ہیت آ زور شاغنگا کہ پنجگور نا امن وایمنی نا جوانی کن الس ءِ سیکورٹی ادارہ غاتون کمک کروئی تمک و پنجگور نا امن وایمنی ءِ داڑان پین جوان جوڑ کننگ مریک۔ کمانڈنٹ ایف سی پارے کہ پنجگور اٹی امن وایمنی نا جوانی و شونداری ڈٹ آتا پوروی اولیکو اولیت آتیٹی اوار ءِ و پنجگور اٹی پرواز فاؤنڈیشن و بی ایس ڈی آئی نا کنڈ آن شونداری ڈٹ آتا دنگ ءِ پین ودفنگک، تعلیمی ادارہ غاتا جوانی، جانجوڑی ہند آتے ٹی آسراتی تا فراوانی تون اوار کل بشخ آتیٹی کاریم برجا ءِ و دا ردوریسہ مستی برجا سلک۔ پنجگور اٹی دیر انا ترند کاختی و کشت وکشار نا شونداری کن پنجگور رخشان ڈور آ تفنگوک آ ڈیم کشت وکشار کن فائدہ تروک پک مریک و دا ڈٹ مسہ سال اٹی پورو مریک‘ او پارے کہ پنجگور نا سیمی علاقہ چیدگی و پروم آ ہنوک آ کسر تیا زُوت کاریم ترندی اٹ بنا کننگک و و دا روڈ انا پوروی مننگ آن علاقہ ٹی کشاری انقلاب بریک‘ او پارے کہ بارڈر اٹی تیل نا پوریا وختی ءِ و دا جاگہ نا ورناک تین کن بدل گیگ روزگار نا بست و بند کیر و خوانندہ ورناک تینا کل چکار ءِ تعلیم آ کیر او پارے کہ حکومت نا کنڈ آن کشاری شونداری کن ورناتے ہرا وام تے تننگانے، او اوفتے کشت وکشار آن بیدس پین جاگہ اس ہم کاریم اٹ اتنگ کپسہ و ہرافک دا پیسہ غاتیان زمبیاد ہلکر اوفتا برخلاف سخت کارروائی کننگک۔ او پارے کہ امن وایمنی ءِ خراب کروک آتتون سختی اٹ مون تننگک۔ دیوان آن پد او چتکان بازار اٹی کار پارکنگ نا بناءِ کرے و پنجگور پریس کلب نا دورہ ءِ ہم کرے۔