بنجائی وزیر عطا تارڑ نا گاڑی نا خڑک آ سم کاری کروک آ دزگیر
Get real time updates directly on you device, subscribe now.
لاہور نا علاقہ ڈیفنس اے ٹی بنجائی وزیر حوالکاری عطا اللہ تارڑ نا گاڑی نا خڑک آ بڑزائی سم کاری نا واقعہ پیش بس، ہراڑان پد پولیس دمدستی کارروائی کرسا اسہ دوبہ دار اسے سلہہ تون اوار دزگیر کرے۔ پولیس دوبہ دار نا گاڑی ءِ ہم دوئی کرسا واقعہ نا جتا جتا پہلو تیان جاست پاست نا بناءِ کرینے۔ پولیس حوالی نا رِد اٹ واقعہ گدرینگوک آ نن ہمو وخت آ پیش بس ہراتم اسہ کار سوار ورنا اس بنجائی وزیر نا گاڑی ءِ اوورٹیک کرے و پاننگوک وڑاٹ بڑزائی سم کاری کرے۔ حوال سینگ تون پولیس و ایلو سیکورٹی ادارہ غاک متحرک مسر و دوبہ دار نا پٹ و پول کن جتا جتا ہند آتیا کارروائی کریر۔ حوالی نا رد اٹ دوبہ دار، ہرادے اسامہ نا پن اٹ درست کننگانے اودے پوسکنوڑ ٹیکنالوجی و سیف سٹی اتھارٹی نا کیمرہ غاتا کمک اٹ ٹریس کرسا دزگیر کننگا۔ پولیس اوڑان سلہہ ہم دوئی کرینے۔