ایران نا عبوری معاہدہ غان دزکش مننگ نا پش اس ہم چرت اف کنے،امریکی صدر ڈونلڈ ٹرمپ

امریکہ نا صدر ڈونلڈ ٹرمپ پارینے کہ اودے ایران نا عبوری معاہدہ غان دزکش مننگ نا پش اس ہم چرت اف۔ قطری نشریاتی ادارہ نا رِد اٹ امریکی صدر امریکی کیبل نیوز نیٹ ورک نیوز نیشن ءِ اسہ گونڈ ءُ ٹیلیفونک انٹرویو اس تس، ہراتم اوڑان تہران نا دا پڑو نا بابت سوج کننگا کہ او تدوک آ تُو امریکہ و ایران نا نیام اٹ دستخط مروک مفاہمتی یادداشت نا پابندی کپک، تو ٹرمپ پارے کہ کنے دا نا پش اس ہم چرت اف۔ او اسہ وار ولدا پارے کہ جنگ انا بنداوی مسخت ایران ءِ ہچ گہس ایٹمی سلہہ دوئی کننگ کن الیپننگ ءِ‘۔ اسلام آباد مفاہمتی یادداشت نا متن نا رِد اٹ دا یادداشت آ جون نا نیام اٹی واشنگٹن و تہران نا نیام اٹی دا جنگ انا ایسری کن دستخط کننگا، ہرادے امریکہ و اسرائیل فروری ٹی بنا کریسر۔ یات سلے کہ ہڑتوم آکنڈآن داسہ نا بھلا جلہو تا بنا ہرمز تنک انا بست و بند نا بابت اختلاف نا سوب آن مس۔ ایلو کنڈ آ روسی میڈیا دعویٰ کرینے کہ اردن اٹی 2 امریکی فوجی نا زوال آن پد صدر ٹرمپ پینٹاگون ءِ پورو ترندی اٹ ایران آ بمباری نا پارت کرینے۔ روسی میڈیا نا رِد اٹ صدر ٹرمپ اردن آ ایران نا میزائل جلہو آتیٹی 2 امریکی فوجی نا زوال آ تینا چپی ءِ پرغسا واقعہ ءِ اسہ بے کچ است ہسون ءُ واقعہ اس گوندا و پارے کہ دا حالیت ءِ ہرسا کنے بے کچ ڈکھ ءِ‘ ای ایران ءِ ہچبر نیو کلیئر سلہہ دوئی کننگ الیپرہ، اگہ ایران ڈیل آ عمل کننگ اٹی اف تو امریکہ ءِ ہم چرت اف۔ داڑان مست امریکی وزیر دفاع پیٹ ہیگستھ اردن اٹی فوجی اڈہ غا ایرانی جلہو نا وخت آ 2 امریکی فوجی نا زوال آ ورندی ترسا پارے کہ اوفتا قربانی امریکہ نا عزم ءِ پین سوگو کیک۔ یات سلے کہ ایران نا کنڈ آن اردن اٹی بیلسٹک میزائل جلہو آتیٹی امریکی فوج انا 2 کارندہ زوال مسوسر ہرادے سینٹ کام پک ہم کرینے۔ حوال آتا رِد اٹ اردن اٹی ایرانی جلہو آتیٹی کیہی امریکی ہیلی کاپٹر آتے بھاز نسخان رسینگانے۔ نیویارک ٹائمز نا رپورٹ نا رِد اٹ اردن اٹی امریکی اڈہ غاتیا ایرانی جلہو نا سوب آن درزن نا کچ امریکی فوجی ٹھپی و بھلو کچ اسے ٹی ہیلی کاپٹر آتے نسخان رسینگا۔ رپورٹ نا رِد اٹ داخس بھلا کہول آ ایرانی جلہو تیٹی امریکی فوجی میرات آتے رسینگوک نسخان آن پاش مریک کہ تہران تون نئے بیرہ نمان میزائل سلہہ ارے بلکن او امریکی فضائی دفاعی نظام آن بچنگ ہم ہیل کرینے۔ امریکی اخبار دا ہیت ءِ ہم نوٹ کرینے کہ ایران تدوک آ پنچ دے اٹی اردن اٹی امریکی فوجی اڈہ غاتیا چار وار جلہو کرینے۔