پاکستان ریلوے جوانی اتنگ و پوسکنوڑی نا چیدہ جوڑ مننگ اٹی ءِ،بنجائی وزیر حنیف عباسی

بنجائی وزیر ریلوے حنیف عباسی پارینے کہ وزیراعظم شہباز شریف نا بصیرتی سرکڑدہی ٹی پاکستان ریلوے اصلاحات، پوسکنوڑ و جوان سروس ڈیلیوری نا چیدہ جوڑ مرسا مونی ہننگ اٹی ءِ‘ او پارے کہ کارکڑد‘ شفافیت و السی آسودہی آ حکومت نا بدل مفروک چکار ریلوے ءِ پوسکنوڑ خواست آتتون ہمگرنچ کننگ نا کسر ملانے تانکہ ہر پاکستانی دا نا بھرم ان فائدہ ہرفنگ کے۔ او وزیراعلیٰ پنجاب مریم نواز شریف نا پبی کمک آ منتواری ہرفسا پارے کہ ”ستھرا پنجاب“ مہم نا رِد اٹ پنجاب مچ آ ریلوے اسٹیشن آتیا سفائی، زیبائی و مسافر آتے جوان آسراتی تا فراوانی کن پوسکنوڑ وڑ وڈول تینائی کننگ انگ ءِ‘۔ بنجائی وزیر پارے کہ وزیراعلیٰ پنجاب نا کمک اٹ صوبہ نا ہشت گٹ ریلوے کوریڈور ءِ پوسکنوڑ ”ملٹیپل یونٹ“ نا کمک اٹ بحال کننگ انگ ءِ‘ وخت اس کہ 117 ریلوے پھاٹک آتیا کارندہ غاتا تعیناتی آن آپریشنل کارکڑد اٹ جوانی، مسافر آتا آسراتی ٹی ودکی و نہادی انسانی جان تا رکھ ءِ پک کننگانے۔ حنیف عباسی پارے کہ وزیراعلیٰ پنجاب نا کنڈ آن تاریخی ریلوے اسٹیشن، ہرافتیٹی ٹیکسلا، راولپنڈی، بھیرہ و لاہور اوار ءُ، اوفتا بحالی و رکھ انا عزم ستا کڑزک۔ او پارے کہ دا گام انا مسخت پاکستان نا تاریخی ریلوے میرات ءِ رکھوک اودے پوسکنوڑ و ڈیجیٹل خواست آتتون ہم گرنچ کننگ ءِ‘ او دا عزم انا درشانی ءِ کرے کہ بنجائی و صوبائی حکومت آک تین پہ تینی کمک اٹ پاکستان ریلوے ءِ پین پوسکنوڑ‘ رکھوک، بھرمی و الس دوست ادارہ اس جوڑ کننگ، قومی رابطہ غاتے سوگو کننگ، زرگزرانی شونداری ٹی کڑد ادا کننگ و ہر پاکستانی ءِ شرف اٹ‘ رکھوک و ارزان سفری آسراتی فراوان کننگ کن تینا کوشست آتے برجا تخرہ۔