دیر انا کمتی آن بلوچستان نا کشارگرک بھاز زیات زہمی مننگ اٹی ءُ،میر صادق عمرانی

بلوچستان نا سینئر صوبائی وزیر و وزیرآبپاشی میر محمد صادق عمرانی وزیراعلیٰ میر سرفراز بگٹی نا خاص آ است خواہی و پارت آ بلوچستان نا گرین بیلٹ پٹ فیڈر کینال و کھیر تھر کینال اٹی دیر انا کاختی ءِ مُر کننگ کن اسہ بڑزکو کہولی ڈل اسے تون اوار تدوک آ دے سکھر نا دورہ ءِ کرے، ڈل اٹی صوبائی وزیر میر محمد سلیم کھوسہ، میر محمد خان لہڑی و سیکرٹری آبپاشی سہیل الرحمن بلوچ اوار ئس۔ ڈل انا دورہ نا مسخت پٹ فیڈر کینال و کھیر تھر کینال اٹی داسہ نا دیر انا تنکی آ سندھ حکومت نا تعلقدار کمامدار آتون ہیت و گپ کننگ ئس۔ ڈل شنبے آ سکھر اٹی محکمہ آبپاشی سندھ انا تعلقدار کمامدار آتون گپ وتران کننگ آن پد تدوک آ کراچی سر مرسا صوبائی وزیر آبپاشی سندھ جام خان شورو و سیکرٹری آبپاشی ظریف احمد کھیوڑو تون باقاعدہ سرکاری مذاکرات کرے۔ دا وخت آ ڈل نا ایلو شریدار آتیٹی بلوچستان آن صوبائی وزیر سردار فیصل خان جمالی، چیف انجینئر کینالز قربان علی جتوئی، کوارڈینیٹر سمیع بلوچ و ایکسین پٹ فیڈر فرید احمد پندرانی اوار ئس۔ مذاکرات اٹی بلوچستان نا ڈل پیدوار موقف تینائی کرے کہ سندھ حکومت محکمہ آبپاشی 1971ء نا معاہدہ نا رِد اٹ بلوچستان نا بشخ انا کچ دیر فراوان کے۔ معاہدہ نا رِد اٹ پٹ فیڈر کینال کن 6700 کیوسک و کھیر تھر کینال کن 2400 کیوسک دیر پک ءِ۔ دیر انا کاختی آن ننا مچ آ علاقہ و خاص وڑ اٹ کشارگر ایلمک بھاز زہمی مننگ اٹی ءُ۔ ہڑتوم آ صوبہ غاتا بڑزکو کمامدار آتا نیام اٹی چار گھنٹہ غان زیات مذاکرات آن پد صوبائی وزیر آبپاشی سندھ جام خان شورو ڈل ءِ باور کرفے کہ بلوچستان نا بشخ انا دیر ءِ امر کہ مرے یلہ کننگک۔ او پارے کہ پٹ فیڈر کینال اٹی شارٹ فال پورو کننگ کن 700 کیوسک وخت اس کہ کھیر تھر کینال اٹی 1000 کیوسک ودکی دیر انا فراوانی ءِ پک کننگک۔