کشمیر ننا شہ رگ ءِ، اینو پاکستان و کشمیر نا کٹپروک رشتہ چیلنج مننگ ءِ وزیر دفاع خواجہ آصف

وزیر دفاع خواجہ آصف پارینے کہ کشمیری مہاجر آتا قدر و شرف بھاز زیات ءِ و کنے ہندا جان تا ندر کننگ آن آجوئی رسینگا ہرافک دتر تسر۔ ایل اے 36 جموں 3 ٹی کارندہ غاتیان تران کرسا خواجہ آصف پارے کہ آزاد کشمیر نا بھاز گچین کاری خنانن ولے ہرا منظر نامہ ٹی دا گچین کاریک مننگ اٹی ءُ مہالو دن متویسس۔ دا گچین کاری کشمیر کاز اتون مہر و کشمیری تا رکھ انا گچین کاری ءِ‘ او پارے کہ کشمیری مہاجر آتا قدر و شرف بھاز زیات ءِ‘ نن ہندا جان تے ندر کروک آتا سوب آن آجوئی رسینگا ہرافک نن کن دتر تسر۔ کشمیر اٹی تولوک پاکستان نا نعرہ خلکوک سد آ ورنا تے دزگیر کننگا ہرا اینو اسکان اُراتے سرمتوس۔ مگہ برطانیہ ٹی تولوک کشمیریک دا کشمیری تا بریبر مننگ کیرہ؟ قائداعظم پاریسس کشمیر ننا شہ رگ ءِ‘ اینو پاکستان و کشمیر نا کٹپروک آ رشتہ ءِ چیلنج کننگ انگ ءِ‘۔ وزیر دفاع مستی پارے کہ کس اس قربانی تیان رشتہ جوڑ کیک و کس اس اراٹی تولوک جوڑ کیک، چار سال اٹی چار ہزار آن زیات قربانی تروک آ فوج ءِ لغور پاننگک، فیلڈ مارشل نا رشتہ وطن تون مہر ءِ‘ شہید و غازی تے سلام ءِ‘ ہرافتے وطن نا عزت ءِ تخار، پاکستان نا پن ایران و امریکہ نا جنگ اٹی ہر زرہ سے آن پد ٹی وی آ خننگک۔ ایلو کنڈ آ بنجائی وزیر داخلہ محسن نقوی یوم الحاقِ پاکستان آ کشمیری تے گچین لوز آتے ٹی خراجِ تحسین و آجوئی نا چراغ ءِ روشنا تخوک کل کشمیری شہید و حریت راہشون تے سلام پیش کرسا پارینے کہ سویلی ایشیا ٹی مدامگی امن کن کشمیر نا ویل ءِ کشمیری تا است خواہی تا رِد اٹ ایسر کننگ المی ءِ۔ اسہ بیان اسے ٹی وزیر داخلہ محسن نقوی پارے کہ 19 جولائی 1947ء نا قرارداد کشمیری تا اجتماعی است خواہی تا حقی درشانی و آجوئی نا جہد انا اہم انگا مزل نا نشان ءِ۔ تاریخی قرارداد کشمیری الس نا پاکستان تون الحاق نا نزور مفروک عزم انا ڈیک ءِ۔ کشمیری سرکڑدہ غاک پاکستان جوڑ مننگ آن مست پاکستان تون تینا آخبت ءِ گنڈاسر۔ محسن نقوی پارے کہ پاکستان و کشمیر نا رشتہ اسیجائی تاریخ، عقیدہ و جغرافیہ نا سوگو رشتہ ٹی گنڈوک ءِ۔ پاکستانی قوم تینا کشمیری ایلم تتون ہم کوپہ سلوک ءِ۔ بھارتی بیدادی تا برخلاف کشمیری تا سگ، استقامت و بے مٹ بہادری تے سلام پیش کینہ۔ محسن نقوی پارے کہ کشمیری الس نا تینا آخبت نا فیصلہ کننگ نا ودی حق ءِ امنا کننگے۔ سویلی ایشیا ٹی مدامگی امن کن کشمیر نا ویل ءِ کشمیری تا استخواہی تا رِد اٹ ایسر کننگ المی ءِ۔ پاکستان کشمیری الس نا وتواجہی نا حق انا بے شڑت آن و اصولی مخ تفی ءِ برجا تخک۔