اوغان ڈغار نا پاکستان نا برخلاف کاریم اٹ اتنگ آ غاوی اُن، حافظ نعیم الرحمن

امیر جماعت اسلامی حافظ نعیم الرحمن اوغانستان نا عبوری حکومت تون غاو انا درشانی ءِ کرسا پارینے کہ اوغان طالبان تیان بھلو غاو اس ارے کہ اوفتا ڈغار پاکستان نا برخلاف کاریم اٹ اتنگ انگ ءِ و او اودے توننگ کپننگ اٹی ءُ۔ اسہ انٹرویو اسے ٹی امیر جماعت اسلامی حافظ نعیم الرحمن پارے کہ ریاستِ پاکستان و عالم دین تا کمک اٹ اوغانستان تون ہیت و گپ کننگے، جہانی کہول آ ہم عالم دین تا تنظیم ارے او ہم داٹی تینا کڑد ءِ ادا کننگ کیک۔ او مستی پارے کہ پاکستان و اوغانستان نا نیام اٹ باندات آتے نارمل کننگ کن چین داڑ اسکان کہ روس ہم تینا کڑد ءِ سر تننگ اٹی ءِ‘ ترکیہ ہم داٹی کڑد ادا کننگ کیک، دا کل اتون اوار مرسا ہیت و گپ ءِ وارخواہی تننگے انتئے کہ جنگ انا سوب آن ہڑتوم آ ملک آتا الس اسہ ایلو آن مُر مننگ اٹی ءِ و دا بھلو نسخان اسے۔ او پارے کہ داٹی اگہ قبیلہ غاتا بندغ آتے پبی نمائندگی تننگے تو اسہ ہندن ءُ گریٹر جرگہ اس جوڑ مننگ کیک ہرا دا ویل ءِ ایسر کننگ کیک۔ امیر جماعت اسلامی تینا ہیت ءِ برجا تخسا پارے کہ ای اسہ ہیت اس المی پاوہ کہ اوغان حکومت آن ننا بھلو غاو اس ارے کہ اوفتا ڈغار پاکستان نا برخلاف کاریم اٹ اتنگ انگ ءِ و او اودے توننگ کپننگ اٹی ءُ، دا مننگ کپک۔ او پارے کہ ہڑتوم آ ملک آتا الس ہچ مف 50 سال اسٹ ایلو ءِ است اٹ جاگہ تسر۔تخار، ناراضی حکومت آن یا فوجی راہشون اسے آن یا پالیسی آن مننگ کیک، الس نا انت قصور ءِ‘ نن تو اسہ ایلو کن بھاز ڈکھ خنانن‘ مچ آ اوغانستان تورا بورا جوڑ مس و اوفتا الس شہید مس تو مچ آ پاکستان دانا نہاد ءِ تس۔ او دا ہم پارے کہ نن اوغان ایلم تے است اٹ تخان، تینا مارکیٹ و کاروبار ءِ اوفتے کن ملان، تو دا تو مننگ کپک کہ اسہ سہب اس بش مرسا نی پاو کہ دا چار واقعہ مسر تو ہمو کل گڑاک چٹار۔ دا مننگ کپک، داڑکن ببو تولن ہیت کین۔ اوغان طالبان تے بھاز ارمان اٹ پاننگ خواوہ کہ اوفتا ڈغار بایدے پاکستان نا برخلاف کاریم اٹ بف‘ و بایدے کس انا ایجنڈا غا کاریم کپس۔ حافظ نعیم الرحمن پارے کہ ای حکومت پاکستان ءِ تو بھاز مہالو آن پاننگ اٹی اُٹ کہ مذاکرات و ہیت و گپ کننگے، اسہ مذاکرات بے سہب مس تو ارٹمیکو مذاکرات بنا کننگے، و مذاکرات دا ویل نا ایسری ءِ‘ اوپارے کہ بارڈر ٹریڈ نا مچ آ پراجیکٹ نا بابت ای ہمو بندغ آتے درست کیوہ ہرا داڑا کاریم ہم کرینو و بھاز جوان ءُ اسٹریٹجک کڑد اس ادا کننگ کیرہ، اگ حکومت ہیت کرے تو نن داٹی تینا بشخ ءِ المی شاغنہ۔