پٹرولیم نا دروغ نا کاختی ودی کروک آتا برخلاف کارروائی کننگے، وزیراعظم شہباز شریف

وزیراعظم محمد شہباز شریف نا کماشی ٹی ڈیہہ اٹی برجا چک و تاڑ نا ملکی زرگزران آ گمانی زہم انا جاچ ہلنگ کن اہم ءُ دیوان اس اڈ ہلک، ہراٹی سادگی و چندر کاری نا گام گیج آتیا سرجم رپورٹ پیش کننگا۔ دیوان آن تران کرسا وزیراعظم پارے کہ ڈیہہ انا حالیت آتیٹی بے باوری ساڑی ءِ، ہندا سوب آن ہر گمانی چیلنج تون مون تننگ کن پورو تیاری کروئی تمک، و گرج انا وخت آ گام گیج کننگ کن جامع سُج پام اس ٹہیفنگے۔ وزیراعظم پارے کہ اللہ نا فضل و کرم اٹ ملکی زرگزران دا وخت آ سوگو ءِ، ولے آخبت اٹی ڈیہہ انا چک و تاڑ نا منفی زہم ءِ مون آتخسا پیشگی ڈٹ بندی المی ءِ۔ او گدرینگوک آ سادگی و چندرکاری مہم اٹی الس نا پبی کمک نا ستا ءِ کرسا پارے کہ مچ آ قوم زمواری نا درشانی کرے، ہراڑا حکومت اوفتا است انا ہُب اٹ منت وار ءِ۔ وزیراعظم زور شاغا کہ دن کہ اٹ الس گدرینگوک آ مہم اٹی پبی کمک کرے، ہندا جوزہ تون چندر کاری ءِ قومی کہول آ شون تروئی ءِ۔ وزیراعظم شہباز شریف پٹرولیم مصنوعات و توانائی نا بچت نا قومی مہم اٹی السی کمک نا ہم ستا ءِ کرے و پارے کہ وخت آ و بھرمی حکومتی سپج پام نا سوب آن ملک اٹی ایندھن نا فراوانی نا حالیت ءِ گچین وڑ اٹ برجا تخنگا۔ او پارے کہ حکومت لس بندغ، موٹر سائیکل سوار، رکشہ ڈیور و ٹرانسپورٹر نا فائدہ غاتا رکھ ءِ کرے، وخت اس کہ حکومتی سبسڈی نا کمک اٹ ایندھن نا نہاد آتیٹی ودکی نا زہم ءِ بھرمی وڑ اٹ کم کننگا۔ وزیراعظم پارت کرے کہ صوبائی حکومت آتا کمک اٹ پٹرولیم مصنوعات نا دروغ نا کاختی ودی کروک آتا برخلاف سخت کارروائی کننگے تاکہ الس ءِ ہچ ءُ وڑ اسے نا خواری اسے تون مون تروئی تمپ۔ دیوان ءِ بریفنگ اٹی پاننگا کہ ملکی گرج آتا رِد اٹ پٹرولیم مصنوعات نا بھلو کوڑی اس ساڑی ارے و آخبت اٹی ہم اوفتا پدریسہ فراوانی ءِ پک کننگ کن کل المی بست و بند آتے پورو کننگانے۔ دیوان اٹی بنجائی وزیرک احد خان چیمہ، محمد اورنگزیب، علی پرویز ملک، اویس خان لغاری، وزیر مملکت بلال اظہر کیانی، وزیراعظم نا سلاہکار طارق باجوہ، گورنر اسٹیٹ بینک جمیل احمد و ایلو بڑزکو سرکاری کمامدار آک بشخ ہلکر۔