موسمیاتی بدلی نا گڑتی تتون مون تننگ کن جہانی کمکاری ءِ سوگو کننگے، وزیراعظم شہباز شریف
مچ آ دنیا ٹی ول ویچڑ انسانی تنکی تتون مون تننگ کن اقوامِ متحدہ نا ادارہ او سی ایچ اے نا خذمت آک ستا کڑزرہ
Get real time updates directly on you device, subscribe now.
وزیراعظم محمد شہباز شریف موسمیاتی بدلی تا سوب آن ودوک خطرہ غاتون مون تننگ کن گام گیج، لائخی و کمکاری ءِ سوگو کننگ نا گرج آ زور شاغانے۔ اقوامِ متحدہ نا انڈر سیکرٹری جنرل انسانی باندات و ایمرجنسی ریلیف کوآرڈینیٹر ٹام فلیچر چارشنبے نادے آ وزیرِاعظم محمد شہباز شریف تون اوڑدہی کرے، ہراٹی نائب وزیرِاعظم و وزیرِ خارجہ سینیٹر محمد اسحاق ڈار، وزیرِاعظم نا سلاہکار ڈاکٹر سید توقیر شاہ، چیئرمین نیشنل ڈیزاسٹر مینجمنٹ اتھارٹی (این ڈی ایم اے) لیفٹیننٹ جنرل انعام حیدر ملک و ایلو بڑزکو کمامدارآک ہم ساڑی ئسر۔ وزیرِاعظم آفس نا میڈیا ونگ آن جاری بیان نا رداٹ وزیرِاعظم مچ آ دنیا ٹی ول ویچڑ انسانی تنکی تتون مون تننگ کن اقوامِ متحدہ نا ادارہ انسانی باندات (او سی ایچ اے) نا کنڈ آن سرتروک خذمت آتا ستاءِ کرے۔ او خاص وڑ اٹ 2022ء نا بھسکار نوکاپ نا وخت آ پاکستان نا کمکاری آاو سی ایچ اے نا منت ءِ ہرفے و ملک اٹی قدرتی آفت آتتون مون تننگ نا لائخی ءِ سوگو کننگ اٹ ادارہ نا کمکاری ءِ قابلِ قدر گوندا۔ وزیرِاعظم پارے کہ پاکستان نا قومی و صوبائی ادارہ غاک تدوک آ سال آتیٹی موسمیاتی بدلی تیان ودی مروک آ قدرتی آفت آتتون مون تننگ نا تینا لائخی ٹی نمان ودکی اس کرینو، ولے او داہیت آزور شاغا کہ موسمیاتی بدلی تا سوب آن ودوک آ خطرہ غاتتون گچین وڑاٹ مون تننگ کن تیاری، مزاحمتی لائخی و کل کہول آتیا تین پہ تینی رابطہ و کمک ءِ پین سوگو کننگ نا گرج ءِ۔ ٹام فلیچر اوڑدہی آ وزیرِاعظم نا منت واری ءِ ہرفسا پاکستان و او سی ایچ اے نا نیام اٹ گدرینگوک آ سال آتیان برجاخڑک کمکاری نا ستاءِ کرے۔ او ڈیہہ اٹی امن و ایمنی نا مونی دننگ کن وزیرِاعظم نا کوشست آتے ہم خراجِ تحسین پیش کرے و پارے کہ مدامگیامن جنگ آتیان ودی مروک انسانی و زرگزرنی تنکی تتون گچین وڑاٹ مون تننگ نا بنداو فراوان کیک۔ اوڑدہی نا وخت آ ٹام فلیچر وزیرِاعظم ءِ غزہ نا انسانی حالیت و ہموڑے کمکی سرجزآتا وخت آ او سی ایچ اے ءِ مون تروک ویل آتا بارواٹ معلومداری تس۔ او اوغانستان اٹی انسانی کمک نا فراوانی کن او سی ایچ اے نا کوشست آتیٹی پاکستان نا پدریسہ کمکاری نا ہم ستاءِ کرے۔ وزیرِاعظم دا عزم انادرشانی ءِ کرے کہ پاکستان جہانی انسانی کمکاری نا مون آ دننگ، قدرتی آفت آتتون مون تننگ نا تیاری و زہمی و نزور تپہ غاتسکان کمک نا وخت آ فراوانی کن اقوامِ متحدہ و او سی ایچ اے تون تینا کمکاری ءِ برجاتخک۔