حکومت پرنٹ و الیکٹرانک میڈیا غا سوشل میڈیا ءِ اہمیت تفک، عطاء تارڑ

سینیٹ نا قائمہ کمیٹی حوالکاری وشینکاری نا دیوان اٹی بنجائی وزیر حوالکاری وشینکاری عطاء اللہ تارڑ پیدوار کرے کہ حکومت پرنٹ و الیکٹرانک میڈیا غا سوشل میڈیا ءِ اہمیت تفک‘ وخت اس کہ میڈیا ورکر آتا آسراتی‘ ریجنل اخبار تا کمکاری، پی ٹی وی نا مالی سوگوی و اشتہاری پالیسی ٹی شفافیت حکومت نا اولیکو اولیت ءُ۔ کمیٹی نا دیوان سینیٹر سرمد علی نا کماشی ٹی اڈ ہلک ہراٹی بنجائی وزیر خصوصی وڑ اٹ بشخ ہلک۔ دیوان اٹی ڈیجیٹل میڈیا پالیسی، اشتہاری پالیسی 2024، پی ٹی وی، ریڈیو پاکستان، اے پی پی، اے بی سی، نیشنل پریس ٹرسٹ و میڈیا ادارہ غاتتون تعلقدار جتا جتا باندات آتا جم جاچ ءِ ہلنگا۔ بنجائی وزیر پارے کہ سوشل میڈیا نا بابت 2021 نا پالیسی ٹی 2022 اٹی ترمیم کننگا، وخت اس کہ اشتہاری پالیسی 2024 اٹی گوگل اینالیٹکس، ویب گرافکس و تھرڈ پارٹی ویریفکیشن نا نظام اوار کننگانے تانکہ شفافیت ءِ پک کننگ مرے۔ او پارے کہ بنجا نا پالیسی ءِ صوبہ غاک ہم تینائی کرینو۔ عطاء اللہ تارڑ پارے کہ ڈیجیٹل میڈیا اسہ جندی پلیٹ فارم اسے و اودے مالی کمک نا گرج اف، ولے حکومت ہموخس اشتہار ایتک ہراخس درکار مرے۔ او پیدوار کرے کہ حکومت نا غٹ آن بھلا اولیت میڈیا ملازم آتا آسودہی ءِ و ڈیجیٹل میڈیا نا شونداری آن پد ہم ہچ ءُ ملازم اسے بے روزگار مننگ کن الیپنہ او پارے کہ اسلام آباد نا بیٹ رپورٹرز و صحافیک اونا زمواری ءُ۔ سنو نیوز نا درور ترسا وزیر حوالکاریپارے کہ ہراتم چینل ملازم آتے فارغ کرے تو حکومت اونا اشتہار آتے تورے، ہراکان پد کیہی ملازم آتے دوارہ بحال کننگا۔ او پارے کہ پی بی اے تون پک کروک وڑ و ڈول نا رِد اٹ حکومت ہراتم میڈیا ہاؤسز نا زرتس آتے ایتک تو ادارہ غاک ہم تینا ملازم آتا زرتس آتے ایترہ۔ بنجائی وزیر پارے کہ اگہ ڈیجیٹل پلیٹ فارم ءِ پین سوگو کننگا تو داڑان اخبار و ٹی وی چینل آتے نسخان مریک، ہندا سوب آن حکومت دا وڑ مننگ کن الیپک۔۔ او پارے کہ ڈیجیٹل پلیٹ فارم آ اولیکو حق اخبار آتا جندی ڈیجیٹل بشخ آتا ءِ و اشتہاری پالیسی 2024 نا رِد اٹ اخبار آتا ڈیجیٹل ساڑی گری ءِ پین سوگو کننگک۔ پی ٹی وی نا کارکڑد آ بریفنگ ترسا او پارے کہ پی ٹی وی اولیکو وار مالی وڑ اٹ سوگو ادارہ جوڑ مسنے و دا وخت آ فیفا ورلڈ کپ نا نشریات مچ آ پاکستان اٹی بیرہ پی ٹی وی سپورٹس آ نشان تننگ انگ ءِ۔