دہشت گرد آتا برخلاف کارروائی تے پین جوان وڑ اٹ برجاتخنگک،میر سرفراز بگٹی

وزیراعلیٰ بلوچستان میر سرفراز بگٹی نا کماشی ٹی ریاستی دفاعی کانفرنس نا 26 میکو دیوان چارشنبے نا دے کوئٹہ ٹی اڈ ہلک ہراٹی صوبہ نا جم سیکورٹی حالیت، دہشت گردی نا برخلاف برجا گام گیج و امن و سوگوی کن بنجائی و صوبائی ادارہ غاتا تین پہ تین کمکاری نا جم جاچ ءِ ہلنگا۔ فورم بلوچستان اٹی پاک فوج، ایف سی بلوچستان و پولیس نا اسیجائی آپریشن شعبان نا پیشرفت آ است جمی نا درشانی ءِ کرسا دہشت گرد آتا برخلاف کارروائی تے پین بھرمی وڑ اٹ برجا تخنگ نا عزم نا درشانی ءِ کرے۔ دیوان نا شریدار آک ہنہ اوڑک و منگی ڈیم انا شہید آتے خراجِ تحسین پیش کریر و دا عزم انا درشانی ءِ کریر کہ شہید آتا قربانیک زیان مفسہ و بلوچستان نا امن و سوگوی کن دہشت گردی نا برخلاف کارروائیک پورو واک اٹ برجا سلرہ۔ وزیراعلیٰ بلوچستان میر سرفراز بگٹی دیوان آن تران کرسا پارے کہ دہشت گردی اسہ قومی ویل اسے ہرانا مون ءِ توننگ کن ملک انا سیاسی و عسکری سرکڑدہ غاک الس نا کمک اٹ اسیجائی وڑاٹ کاریم کننگ اٹی ءُ‘ او پارے کہ شرپسند و اوفتا کمکار آتے ایسر اسکان سر کننگک و ریاست دشمن آتیکن بلوچستان اٹی ہچ ءُ جاگہ اس اف۔ وزیراعلیٰ پارے کہ صوبہ ٹی گورننس ءِ پین بھرمی جوڑ کننگ کن اصلاحاتی گام گیج کننگ انگ ءِ تانکہ ریاستی ادارہ غاتا کارکڑد اٹی پینی جوانی بر و الس ءِ جوان خذمت آتا فراوانی پک کننگ مرے۔ وزیراعلیٰ پارے کہ صوبائی حکومت سیکورٹی فورس آتتون پورو ہم گرنچی نا رِد اٹ نئے بیرہ امن وایمنی بلکہ بلوچستان نا تعمیر و شونداری، خاص وڑ اٹ مُر انگا و پدتموک علاقہ غاتیٹی شونداری ڈٹ آتیا ہم پبی چکار کننگ اٹی ءِ‘ انتئے کہ مدامگی امن و شونداری اسہ ایلو تون گنڈوک ءُ۔ دیوان اٹی بنجائی و صوبائی ادارہ، کانود نافذ کروک محکمہ و سیکورٹی فورس آتتون اوار پاکستان آرمی، ایف سی، پاکستان کوسٹ گارڈ، پولیس، ایف آئی اے، کسٹمز و ایلو تعلقدار ادارہ غاتا نمائندہ غاک بشخ ہلکر۔ دیوان نا اخیر اٹ دا ارادہ نا دوارگی ءِ کننگا کہ بلوچستان اٹی امن، ریاستی رٹ انا سوگوی و الس نا رکھ اکن کل تعلقدار ادارہ غاک تین پہ تینی کمکاری و گچین سج پام نا رد اٹ تینا زمواری تے سرایترہ۔