پاکستان و بلوچستان نا رشتہ قیامت اسکان برجا سلک،وزیر اعلیٰ میر سرفراز بگٹی

وزیراعلیٰ بلوچستان میر سرفراز بگٹی پارینے کہ پاکستان و بلوچستان اسہ ایلو کن المی ءُ و دا رشتہ قیامت اسکان برجا سلک۔ او پیدوار کرے کہ ریاست نا سلامتی، وتواجہی و قومی سلامتی آ ہچ ءُ وڑ انا سمجھوتہ اس مننگ کپک‘ آئینِ پاکستان نا دنگ اٹی ہر وڑ انا مذاکرات کن حکومت نا درگہ غاک ملوک ءُ۔ دا خیال آتا درشانی ءِ او 20 میکو نیشنل ورکشاپ بلوچستان نا شریدار آتیان تران کرسا کرے۔ وزیراعلیٰ پارے کہ زوراکی، سوشل میڈیا غا تالان کروک ریاست مخالف پروپیگنڈہ و دہشت گرد آتا کانود آن چَپ توار ریاست نا برخلاف خار و تاڑ واڑ ءِ ودفنگ اٹی ءِ‘ او پارے کہ دا وڑانا وڑ وڈول تا کمک اٹ ریاست پاکستان ءِ نزور کننگ و اودے بشخ وبانٹ کننگ نا منظم سازش کننگ انگ ءُ، ہرافتے امر کہ مرے بے سہب کننگک۔ میر سرفراز بگٹی پارے کہ بے بریبر شونداری ءِ زوراکی و دہشت گردی نا بنداوی سوب گوندنگ راستکی تیان چَپ ءِ‘ او سوج ہرفے کہ اینو تربت تون اوار بلوچستان نا کیہی علاقہ غاک بھاز شون ہلوک ءُ تو مگہ ہموڑے پن انا تحریک آک چٹار؟ داڑان پیدوار مریک کہ ویل شونداری اف بلکن اسہ مخصوص ءُ سوچ اسے۔ او پارے کہ ریاست مخالف آتا مسخت الس نا شونداری، شونہالی یا پسماندگی نا چٹفنگ اف بلکن سم انا زور آ تینا نظریہ ءِ بیٹ کننگ ءِ‘ دا بندغ آک پاکستان ءِ کیک انا وڑاٹ کاٹ کننگ خوارہ، ولے قوم و ریاست اوفتا دا ارادہ غاتے ہچ گہس سرسہب مننگ کن الیپک۔ وزیراعلیٰ پارے کہ حکومت آئین نا دنگ اٹی مرسا ہر وڑ انا مذاکرات کن تیار ءِ‘ ولے اگہ کس اس ریاستِ پاکستان ءِ پرغنگ یا اونا سلامتی ءِ نسخان رسیفنگ نا سوچ تخک تو دا وڑ انا سوچ آ ہچ ءُ ہیت و گپ اس مننگ کپک۔ او پارے کہ ریاست ہر گڑا غان زیارت ءِ و قومی سلامتی آ ہچ ءُ سمجھوتہ اس مننگ کپک۔ او دا ارادہ نا نا دوارگی ءِ کرے کہ ریاست پاکستان نا دفاع، سوگوی و بقا کن تینا جان ءِ تننگ آن ہم پدی مفنہ۔ میر سرفراز بگٹی پارے کہ گورننس، انتظامی باندات و السی خذمت آتتون تعلقدار غاو و گڑتی تے چٹفنگ کن حکومت سنجیدہ گام گیج کننگ اٹی ءِ‘ ولے ریاست نا وحدت آ ہچ ءُ سمجھوتہ اس مفک۔ ورنا تا پت بیرہ شفاف، کنڈہلپروک و میرٹ آ بنداو تروک نظام نا کمک اٹ بحال کننگ مریک۔ حکومت پوسکنوڑ ٹیکنالوجی آن فائدہ ہرفسا آرٹیفیشل انٹیلیجنس نا کمک اٹ سرکاری بھرتی تا عمل ءِ پورو شفاف و میرٹ آ کننگ کیک تانکہ ہر لائخ آ اومیتدار ءِ بے فرق بریبر وارخواہی رسینگ کے۔ ورکشاپ نا اخیر اٹ ٹی وزیراعلیٰ شریدار آتا سوج آتا جم و دلیل اٹ ورندی تس و سوج و ورندی نا دا سیشن دو نیم گھنٹہ غان زیات وخت اسکان برجا سلیس۔