پنجگور نا ویل آتے اولیت نا بنداو آ ایسری کن کوشست کننگ اٹی اُن،پھلین بلوچ

پنجگور، نیشنل پارٹی نا بنجائی راہشون و قومی اسمبلی نا اسٹینڈنگ کمیٹی انفارمیشن نا باسک پھلین بلوچ پنجگور پریس کلب نا دورہ ءِ کرے و ملکی و علاقائی حالیت آتیا گپ و تران کرے و صحافی تتون پروگرام حال احوال اٹی خیال آتا درشانی ءِ کرے، دا وخت آ نیشنل پارٹی نا قائم مقام ضلعی صدر کامریڈ مجیب الرحمن، بنجائی راہشون و پنی آ اوکیل ایڈوکیٹ علاؤالدین بلوچ، حاجی محمد نواز جاوید کچکول، ملک محمد عوض بلوچ، داد محمد بلوچ، محب کریم، ضمیر احمد و ایلو راہشونک اوڑتون اوار ئسر، دا وخت آ پنجگور نا جتا جتا علاقائی ویل، بنداوی آسراتی، کسر، بجلی، گیس، موبائل انٹرنیٹ و ایلو السی ویل و خواری تیا جم گپ وتران کننگا۔دا وخت آ او تران کرسا پارے کہ ننے پنجگور نا کل ویل آتیان جوان سماءِ و ویل آتے اولیتی بنداو آ ایسر کننگ کن کوشست کننگ اٹی اُن و بھاز انگا ویل آتے ایسر کننگ اٹی سرسہبی ملانے و پنجگور نا الس نا بھاز اہم انگا ویل آتا ایسری و بنداوی آسراتی تا فراوانی نا بابت بھاز زوت مستائی ہلنگک‘ او پارے کہ پنجگور چیدگی بارڈر و پنجگور آن بائی پاس آواران آن کراچی اسکان کسر نا تفنگ نا بابت برزکو کمامدار آتے معلومدار کننگانے، او پارے کہ بنجائی وزیرک دا باندات کمک کننگ ناباور کرفینو و کسر تا تفنگ کن کوشست آک برجا ءُ و گچک آواران روڈ آ کاریم ترندی اٹ برجاءِ و پنجگور نا الس کن کراچی آ ہننگ کن خڑک آخبت اٹی آسانی مریک و منہ گھنٹہ ٹی کراچی آ سر مننگ کن دا کسر تفنگ انگ ءِ‘ او پارے کہ ہن وبر و خاص وڑ اٹ کاروبار کن کسر تا اسہ اہم ءُ کڑد اسے و پنجگور نا پوریاگر و زمیندار آتے دا کسر نا پوروی آن پد آسراتیک دوئی مریرہ و تینا ڈغار تیان ودی مروک فصل آتے کراچی و ملک انا ایلو منڈی تسکان آسانی اٹ سر کننگ کیرہ، اسہ سوج اسے نا ورندی ٹی پنجگور اٹی بنداوی آسراتی ایل پی جی گیس پلانٹ نا بابت او پارے کہ پنجگور ءِ ایل پی جی پلانٹ نا کمک اٹ گیس انا فراوانی کن کوشست کننگ انگ ءِ تاکہ شاری تے توانائی نا دا بنداوی آسراتی آن فائدہ رسینگ کے ولے جہانی بدل مروک حالیت آتا سوب آن گیس انا فراوانی کن پیش رفت مفننگ ءِ‘ ولے ننا کوشست برجا ءِ کہ پنجگور ءِ گیس فراوان کننگے انتئے کہ یخ انگا علاقہ مننگ نا سوب آن السی آسراتی کن ایل پی جی گیس پلانٹ اسہ بنداوی گرج اسے۔ (تلار نیوز)