کوئٹہ ٹی اولیکو انٹرپرہنور شپ وان ایٹ اڈ تننگ جوان ءُ گام اسے،جعفرخان مندوخیل

گورنر بلوچستان جعفرخان مندوخیل پارینے کہ صوبائی دارالحکومت کوئٹہ ٹی اولیکو انٹرپرہنورشپ وان ایٹ (Won-it) اڈ تننگ اسہ جوان ءُ گام اسے۔ وان ایٹ اصل اٹ پوسکنوڑ ڈیجیٹل واپاری رجحان اتٓتون ہم گرنچ مننگ، کاروبار نا پوسکن آ وڑ و ڈول تے تینائی کننگ و زرگزرانی وتواجہی ءِ پک کننگ کن اسہ یکتا ءُ ڈیجیٹل انٹرپرینیورشپ پلیٹ فارم اسے۔ دا نا مسخت لائخ آ ورنا تے پوسکن آ بزنس آئیڈیاز و اسٹارٹ اپس ءِ اسہ ہندن ءُ قومی پلیٹ فارم اس فراوان کننگ ءِ‘ ہراڑے او تینا کاروباری خیال آتے پیش کیر، چاہندار آتیان راہشونی دوئی کیر و تینا تغ تے پورو کننگ کن بزنس گرانٹس دوئی کننگ کیر۔ دا رد اٹ چیئرمین وان ایٹ پرنس آغا عمر احمدزئی و اونا مچ آ ٹیم انا کوشست آک ستا کڑزرہ۔ دا خیال آتا درشانی ءِ او بیوٹمز یونیورسٹی ٹی ڈیجیٹل انٹرپرہنورشپ وان ایٹ نا کنڈآن پروگرام اٹی ہیت و گپ کرسا کرے۔ ڈیجیٹل انٹرپرہنورشپ پروگرام نا کل فائنلسٹس آک پچ شو اٹی تینا کاروباری تصور آتے پیش کریر ہرافتے گورنر بلوچستان ستاکڑزوک گوندا۔ دا وخت آ پارلیمانی سیکرٹری بہبودِ آبادی پرنس آغا عمر احمدزئی، بیوٹمز یونیورسٹی نا وائس چانسلر ڈاکٹر خالد حفیظ، پرو وائس چانسلر ڈاکٹر میروایس کاسی و ادارہ وان ایٹ نا چیف ایگزیکٹو آفیسر عمر اجمل تون اوار بیوٹمز یونیورسٹی نا فیکلٹی باسک آک ساڑی ئسر۔ دا وخت آ گورنر بلوچستان جعفرخان مندوخیل پارے کہ ڈیجیٹل انٹرپرہنورشپ وان ایٹ نا اڈ تننگ نا مسخت بلوچستان اٹی پوسکن آ واپاری رجحان و انٹرپرینیورشپ ءِ شون تننگ، ورنا تا پوسکنوڑ کاروباری آئیڈیاز ءِ قومی کہول آ پاش کننگ، اسٹارٹ اپس ءِ زرکار‘ راہشونی و نیٹ ورکنگ نا وارخواہی فراوان کننگ و زرگزرانی سیبو نا است بڈی کننگ ءِ‘ او او پارے کہ دا پوسکن آ رجحان آتے درستی راستی کرفنگ آن ننے بلوچستان نا مثبت، لائخ و شونداری امیج دنیا نا مون آ پیش کننگ اٹی کمک رسینگک۔ گورنر جعفرخان مندوخیل پارے کہ ننا صوبہ نا ورناک تینا ڈکوک لائخی تیٹی ہچ گہس پدی افس، ہندا سوب آن المی ءِ کہ اوفتے کل المی وارخواہی و آسراتیک فراوان کننگ مریرہ۔ ڈیجیٹل انٹرپرہنورشپ نا اڈ تننگ آن پد داسہ لائخ آ ورناک بایدے تینا لائخی تیٹی گچینی ودی کیر‘ انفرادی کہول آ جندی کاروبار بنا کیر و زرگزرانی وڑاٹ وتواجہ مننگ نا بریبر وارخواہی تیان پورو فائدہ ہرفر۔ ہنداوڑ او تینا تغ تے پورو کننگ نا لائخ جوڑ مریر۔