ماشکیل،24 گھنٹہ حاضری و ایمبولینس نا جوڑجاڑ ءِ پک کننگے،اسسٹنٹ کمشنر ثناء اللہ بلوچ

اسسٹنٹ کمشنر ماشکیل ثناء اللہ بلوچ رورل ہیلتھ سینٹر (RHC) ماشکیل نا دورہ ءِ کرے ہراڑے او ہسپتال نا ڈاکٹر، پیرا میڈیکل اسٹاف و ایلو ملازم آتون اوار جم دیوان اس اڈ ہلک۔ دیوان اٹی ہسپتال نا مچ آ کارکڑد‘ ناجوڑ آتے فراوان کننگوک طبی آسراتی، ایمرجنسی خذمت و مون تروک ویل آتا جاچ ءِ ہلنگا۔ اسسٹنٹ کمشنر دیوان آن تران کرسا پارت کرے کہ ہسپتال اٹی 24 گھنٹہ ڈاکٹر و طبی کارندہ غاتا ساڑی گری ءِ امر کہ مرے پک کننگے تانکہ ہر وڑا نا ہلہلہ ئی حالیت اسے ٹی ناجوڑ آتے وخت آ و آب اٹو طبی آسراتی فراوان کننگ مرے۔ او پیدوار کرے کہ الس نا غاو تے ہچ سگنگ مفک و زمواری تے ٹی ڈیوالئی، غیر حاضری یا ناجوڑ آتتون جوان یپش بفروک کارندہ غاتا برخلاف سخت کانودی و محکمانہ کارروائی کننگک۔ وخت اس کہ پدریسہ غیر حاضری آ آدم خان وارڈ بوائے و ثناء اللہ نرسنگ اردلی نا رپورٹ ءِ سیکرٹری جانجوڑی آ راہی کننگک۔ دیوان نا وخت آ آر ایچ سی ماشکیل نا خراب ایمبولینس نا دمدستی جوڑجاڑ نا پارت ہم جاری کننگا تانکہ ناجوڑ آتا وخت آ سرکننگ ءِ پک کننگ مرے و ایمرجنسی طبی خذمت آتیٹی ہچ ءُ اڑاند اس پیش بف۔ دا وخت آ اسسٹنٹ کمشنر ثناء اللہ بلوچ ہسپتال انتظامیہ و کارندہ غاتے ءِ باور کرفے کہ آر ایچ سی ماشکیل کن درکار کل المی طبی آسراتی، دارو، ازباب و ایمرجنسی گرج آتا فراوانی کن ہر وڑ انا گام گیج کننگک تانکہ علاقہ نا الس ءِ جوان و آب اٹو طبی آسراتی دوئی مننگ کے۔دیوان نا اخیر اٹ او پارے کہ الس ءِ جانجوڑی نا گچین آسراتی فراوان کننگ انتظامیہ نا اولیکو اولیت ءِ و دا مسخت نا دوئی کننگ کن ہچ ءُ وڑ اسے نا کمتی سگنگ مفک۔