اے سی ماشکیل نا بجلی نا کھمبہ غاتا خلنگ نا کاریم نا سرجم دورہ

اسسٹنٹ کمشنر ماشکیل ثناء اللہ بلوچ نا پارت آ بابو عبدالمالک ریکی مین ٹرانسمیشن لائن آ برجا بجلی نا کھمبہ غاتا خلنگ نا کاریم نا جم جاچ ءِ ہلک۔ دورہ نا وخت آ او تعلقدار ٹھیکیدار و کارندہ غاتے پارت کرے کہ کاریم اٹی پین ترندی اتنگے و پک کروک وخت آن مست اودے پورو کننگے تانکہ بھلا باسنی نا سوب آن کیہی دے آن بجلی آن محروم الس ءِ زُوت آن زُوت بجلی نا فراوانی بحال کننگ مرے۔ ٹھیکیدار پارے کہ مین ٹرانسمیشن لائن آ کل 34 کھمبہ غاتا خلنگ نا ڈٹ برجا ءِ‘ ہرافتیان 20 کھمبہ غاتا خلنگ پورو مسنے وخت اس کہ ایلو 14 کھمبہ غاتا خلنگ نا کاریم ہم ترندی اٹ برجا ءِ و اودے زُوت پورو کننگک۔ بابو عبدالمالک ریکی پارے کہ ضلعی انتظامیہ الس ءِ مون تروک خواری تیان جوان وڑاٹ آگاہ ءِ و بجلی نا بحالی کن غٹ دوئی وسیلہ غاتے کاریم اٹ اتنگ انگ ءِ‘ او تعلقدار کمامدار و ٹھیکیدار آ زور شاغا کہ کاریم نا آب آ ہچ ءُ وڑ اسے نا سمجھوتہ کننگ مفک و پک کروک وخت آن مست ڈٹ ءِ پورو کرسا بجلی نا فراوانی ءِ بحال کننگے تانکہ بھلا باسنی آن زہمی الس ءِ دمدستی وڑاٹ آسودہی رسینگ کے۔ماشکیل (نصیر کبدانی)