بلوچستان نا ارسا نا پک کروک 2400 کیوسک دیر کننگ انگ ءِ،چیف انجینئر کینالز بلوچستان

کیرتھر کینال اٹی بلوچستان نا روا انگا بشخ انا دیر انا پدریسہ تفننگ آ چیف انجینئر کینالز بلوچستان قربان علی جتوئی سکھر بیراج نا ہلہلہ ئی دورہ ءِ کرسا کمشنر سکھر عابد سلیم قریشی و چیف انجینئر سکھر بیراج تون جتا جتا اوڑدہی کرے و سخت گڑتی تا درشانی ءِ کرے۔ اوڑتون ایگزیکٹو انجینئر پٹ فیڈر کینال فرید احمد پندرانی و ایگزیکٹو انجینئر کیرتھر کینال غلام محمد بادینی ہم ساڑی اوار ئس‘ وخت اس کہ کمشنر نصیر آباد ڈویژن صلاح الدین نورزئی ہم رابطہ ٹی ئس۔ دا وخت آ کمشنر سکھر عابد سلیم قریشی بلوچستان ءِ کیرتھر کینال اٹی اونا روا انگا بشخ انا دیر فراوان کننگ نا باور کرفے، وخت اس کہ سکھر بیراج نا مختیار احمد ابڑو چیف انجینئر ءِ دیر انا حالیت آ بریفنگ ہم تس۔ قربان علی جتوئی پیدوار لوز آتیٹی پارے کہ بلوچستان ءِ دا وخت آ ارسا کانود نا رِد اٹ پک کروک 2400 کیوسک دیر تفننگ انگ ءِ‘ ہرانا سوب آن کیرتھر کینال نا ہزار آ کشارگرک سخت خواری تا گواچی ءُ و محکمہ آبپاشی آ سخت زور شاغنگ انگ ءِ او پارے کہ صوبائی وزیر آبپاشی میر محمد صادق عمرانی و صوبائی سیکرٹری آبپاشی سہیل الرحمن بلوچ نا پارت آ دورہ کننگانے و اومیت کننگ مریک کہ بلوچستان ءِ دمدستی وڑاٹ اونا پورو حق تننگک۔ او پارے کہ کاختی آن پد ہم سندھ و پنجاب نا آبپاشی کمامدار آک بلوچستان ءِ اونا روا انگا بشخ ءِ تننگ نا پابند ءُ انتئے کہ بلوچستان نا دیر جم بشخ انا مون اٹ بھاز کم ءِ‘ اگہ وخت آ کشاری دیر فراوان کننگتو تو بلوچستان نا گرین بیلٹ بھسکاری نا گواچی مریک۔ او پیدوار کرے کہ وزیراعلیٰ بلوچستان میر سرفراز بگٹی و چیف سیکرٹری بلوچستان شکیل قادر خان نا پارت آتا رِد اٹ کشارگر آتا حق آتا رکھ و دیر انا فراوانی کن ہر وڑ انا عملی گام گیج برجا سلک و بلوچستان نا کشارگر آتے ہچ ءُ حالیت اسے ٹی تنیا الیپنہ۔