الس ءِ گچین و رکھوک سفری آسراتی تا فراوانی ءِ پک کننگے،سیکرٹری محکمہ مواصلات

سیکرٹری محکمہ مواصلات و تعمیرات بابر خان نا کماشی ٹی ڈپارٹمنٹل سب کمیٹی نا اسہ اہم ءُ دیوان اس اڈ ہلک ہراٹی ضلع قلات و ضلع کوہلو ٹی محکمہ نا سلاہ ئی شونداری ڈٹ آتا جم جاچ ءِ ہلنگا۔ یات سلے وزیراعلیٰ بلوچستان میر سرفراز بگٹی نا وژن، صوبائی وزیر مواصلات و تعمیرات میر سلیم احمد کھوسہ نا خاص پارت و سیکرٹری مواصلات و تعمیرات بابر خان نا چاروکی ٹی پد ریسہ ڈی ایس سی اڈ تننگ مننگ ءِ‘ تانکہ صوبہ ٹی دا اسکیم آتے زُوت آن زُوت بنا کننگے۔ دیوان اٹی چیف انجینئر سبی زون زبیر احمد کھوسہ، چیف انجینئر قلات خضدار زون عزیزاللہ کاسی، ایس ای قلات سرکل ظفر بنگلزئی، پلاننگ اینڈ ڈویلپمنٹ (پی اینڈ ڈی) نا کمامدار و تعلقدار ایگزیکٹو انجینئر آک بشخ ہلکر۔ دیوان نا وخت آ دا ضلع غاتے ٹی محکمہ مواصلات و تعمیرات نا رِد اٹ جتا جتا سڑک آتتون تعلقدار شونداری ڈٹ آتیا جم سجفنگا۔ تعلقدار کمامدار آک ڈٹ آتا فزیبلٹی، بروک خڑچ‘ تکنیکی پلو و سلاہ ئی پورو مننگ نا وخت انا بابت جم بریفنگ تسر۔ دیوان اٹی دا ہیت آ زور شاغنگا کہ برجا شونداری ڈٹ آتے پک کروک وخت اٹ و بڑزکو کہولی آب انا رِد اٹ پورو کننگے تانکہ الس ءِ جوان و رکھوک سفری آسراتی تا فراوانی پک مرے۔ ڈپارٹمنٹل سب کمیٹی جتا جتا پوسکن آ روڈ انفراسٹرکچر ڈٹ آتتون اوار روڈآتا تفوئی و جوڑجاڑ تون تعلقدار کیہی اسکیم آتا منظوری نا سلاہ تس۔ دیوان اٹی فیصلہ کننگا کہ منظور مروک ڈٹ آتیا زُوت آن زُوت عملی کاریم نا بنا کن کل کانودی، انتظامی و تکنیکی خواست آتے وخت آ پورو کننگے۔ دا وخت آ سیکرٹری مواصلات و تعمیرات بابر خان تران کرسا پارے کہ شونداری ڈٹ آتیٹی شفافیت، آب و وخت آ پوروی ءِ امر کہ مرے پک کننگے۔ او تعلقدار افسر آتے پارت کرے کہ ڈٹ آتا چاروکی و مانیٹرنگ نا نظام ءِ پین بھرمی جوڑ کننگے و ہچ ءُ وڑ اسے نا ڈیوالئی یا بے گرج ہُرے مننگ ءِ ہچ سگنگ مفک۔