دہشت گرد آتا خلاف سیکورٹی فورس آتا کارروائی شرف کڑزک،وزیر داخلہ محسن نقوی

بنجائی وزیر داخلہ محسن نقوی بلوچستان اٹ برجا آپریشن شعبان اٹی پین سرسہبی تا ستا ءِ کرسا پارینے کہ فتنہ الہندوستان نا دہشت گرد آتا برخلاف سیکورٹی فورس آتا گچین کارروائی تے قوم قدر انا نظر اٹ ہرک۔ تینا بیان اٹ بنجائی وزیر محسن نقوی پارے کہ پاک فوج، ایف سی بلوچستان و پولیس نا اسیجائی آپریشن اٹ بھاز سرسہبی ستاکڑزک، سیکورٹی فورس آک فتنہ الہندوستان نا دہشت گرد آتا ناپاک عزم آتے بے سہب کریر۔ او پارے کہ سیکورٹی فورس آتا وخت آ کارروائی تیٹی پین 4 دہشت گرد آتے دوزخی کننگا، دہشت گرد آتا چٹفنگ اسکان فورس آتا اسیجائی آپریشن برجاسلک، مچ آ قوم دہشت گردی نا ناچوڑ نا برخلاف جنگ کروک تینا بہادر ورناتتون ہم کوپہ سلوک ءِ‘ دا رد اٹ پاک فوج، ایف سی بلوچستان و پولیس نا اسیجائی ”آپریشن شعبان“ برجاء ءِ۔ پنچ جولائی آن دا وخت اسکان آپریشن شعبان و ایلو انٹیلی جنس بیسڈ آپریشن تیٹی جم وڑاٹ 121 خارجی دہشت گرد دوزخی کننگانو۔ سیکورٹی حوالی نا رداٹ سیکورٹی فورس آتا فتنہ الخوارج نا برخلاف علاقہ ٹی گچین کارروائی تا ردوریسہ برجاءِ۔ سیکورٹی فورس آتا کنڈآن خارجی تے فضائی و ڈغاری کارروائی تا کمک اٹ شست کننگ انگ ءِ، سیکورٹی فورس آتا گچین کارروائی تیٹی خارجی دہشت گرد آتے بھلو نسخان اس مون تروئی تمنگ ءِ، سیکورٹی فورس آتا گچین کارروائی تا وخت آ پین 4 دہشت گرد آتا دوزخی مننگ نا پک حوال آک ءُ، آپریشن شعبان اٹی دوزخی مروک آ دہشت گرد آتا جم کچ 83 مسنے، پنچ جولائی آن دا وخت اسکان آپریشن شعبان و ایلو انٹیلی جنس بیسڈ آپریشن تیٹی جم وڑاٹ 121 خارجی دہشت گرد آتے دوزخی کننگانے۔ گڈیکو دہشت گرد آتاچٹفنگ اسکان بلوچستان اٹی آپریشن شعبان برجا سلک۔