ڈیہہ اٹی امن و سوگوی کن پاکستان نا کوشست آک ستا کڑزرہ، یو این

نائب وزیراعظم و وزیر خارجہ سینیٹر محمد اسحاق ڈار تون اقوامِ متحدہ نا سیکرٹری جنرل نا عہدہ نا اومیتدار مشیل باشلیٹ جیریا اوڑدہی کرے۔ او ڈیہہ اٹی امن و سوگوی کن پاکستان نا پدریسہ کوشست آتا ستاءِ کرے۔ سے شنبے نادے آوزارت خارجہ غان جاری بیان نا رداٹ نائب وزیراعظم و وزیر خارجہ اقوامِ متحدہ نا منشور نا مسخت و اصول آتا مونی دننگ، جہانی کانود و جہانی معاہدہ غاتا شرف اکن پاکستان نا پکا عزم انا درشانی ءِ کرے۔ او جہانی شونداری ایجنڈا ءِ مونی دننگ اٹ اقوامِ متحدہ نا اہم کڑد آ زور شاغسا پارے کہ ادارہ ءِ پدتموک ملک آتا گرج و اولیت آتارداٹ گچین پرسجوئی مروئی تمک۔ نائب وزیراعظم و وزیر خارجہ مدامگی جہانی امن کن اقوامِ متحدہ نا سلامتی کونسل نا قرارداد آتیاپورو و ایمانداری اٹ عملدرآمد نا کمک اٹ جہانی جھیڑہ غاتا پرامن ایسری نا گرج آ ہم زور شاغا۔ او خاص وڑ اٹ جموں و کشمیر نا ویل و فلسطین نا ویل انا انصاف و مدامگی ایسر ی نا اہمیت آ ہیت کرے۔ مشیل باشلیٹ جیریا ڈیہہ اٹی امن و سوگوی نا مونی دننگ کن پاکستان نا پدریسہ کوشست آتا ستاءِ کرے و اقوام متحدہ کن گدرینگوک آ سال آتیٹی پاکستان نا خذمت و نمان کڑد انا ستاءِ کرے۔