ننا آئین مذہب و نسل آن ایڑتر کل ءِ بریبر وارخواہی نا ضمانت ایتک،جعفرخان مندوخیل

گورنر بلوچستان جعفرخان مندوخیل پارینے کہ نن اولیکو دے آن گورنر ہاؤس نا درگہ غاتے کل شاری تے کن اوفتا مذہب و نسل آن ایڑتر ملوک الانن۔ آئین پاکستان نا رد اٹ ہر اقلیتی باسک ہم دا ملک اٹی بریبر نا شاری ءِ و 1973 نا آئین ننے کل ءِ بریبر وارخواہی، بنداوی آسراتی و جان و مال انا رکھ انا ضمانت ایتک۔ گورنر ہاؤس بروک سوالیک چاہے ہرا پڑ آن مریر اوفتا مون تروک ویل آتے کم کننگ آن ذہنی سکون است جم مریک۔ دا خیال آتا درشانی ءِ او گورنر ہاؤس کوئٹہ ٹی پاکستان مسلم لیگ (ن) آن تعلقدار پنجاب صوبائی اسمبلی ناباسک چیئرمین پاکستان کرسچن الائنس و وزیراعلیٰ پنجاب نا انسپکشن ٹیم انا باسک ایمانوئل ایتھر جولیس تون اوڑدہی نا وخت آ ہیت و گپ کرسا کرے۔ دا وخت آ گورنر بلوچستان جعفرخان مندوخیل پارے کہ دا جاگہ نا مسیحی برادری تون اوار ننا ایلو کل اقلیت آتا سرکڑدہ غاتتون ہم بھاز جوان و فعال تعلقداری ارے۔ ای گورنر بلوچستان نا وڑ اٹ باقاعدہ اوفتا جتا جتا پروگرام و مذہبی دود آتیٹی بشخ ہلیوہ۔ گورنر مندوخیل مستی پارے کہ اسہ اقلیتی راہشون و پنجاب صوبائی اسمبلی نا باسک انا کوئٹہ نا دورہ بین الصوبائی یکجہتی ءِ شون تننگ اٹی اہم ءُ کڑد اس ادا کیک۔ او زور شاغا کہ دا وڑ انا السی کہول آ حال حوال و تعلقداریک صوبہ غاتا نیام اٹی پول انا کاریم ءِ کیرہ، اسیجائی افہام و تفہیم و تین پہ تینی شرف ءِ شون ایترہ۔ او پارے کہ ہڑتوم آ صوبہ غاتا الس نا الس تون تعلقداری و حال حوال ودفنگ نا بھاز مثبت بھرم مون آ بریک۔ ہڑتوم آ سرکڑدہ غاک صوبہ غاتا نیام اٹی السی کہول آ حال حوال ءِ ودفنگ و فعال کمکاری نا اہمیت آ زور شاغار۔