دہشت گردی نا کمک اٹ شاری تے شست کننگ سجفوک سازش اسے،وزیر اعلیٰ میر سرفراز بگٹی

وزیراعلیٰ بلوچستان میر سرفراز بگٹی پارینے کہ دشمن نا منظم ءُ سازش اسے کہ دہشت گردی نا کمک اٹ کودک شاری تے شست کننگے و ولدا اونا دوبہ ءِ ریاست آ خلسا بلوچستان اٹی بے پتی و تاڑواڑ تالان کننگے‘ ولے حکومت و الس نا اسیجائی واک دا وڑ انا کل سازش آتے بے سہب کیک۔ او پارے کہ پاکستان و بلوچستان نا کسر امن، سوگوی و شونداری نا کسر اٹی ءِ و نن ہچ ءُ زوراکی یا دہشت گردی نا کمک اٹ دا کسر آن پدی مفنہ۔ او دوشنبے نا دے کوئٹہ ٹی بلوچستان نا عظیم سیاسی راہشون و شہید نوابزادہ میر سراج خان رئیسانی نا ہشتمیکو کزیہ دے انا رد اٹ اڈ تروک ہڑزخواہی ریفرنس آن تران کرسا کرے۔ ہڑزخواہی ریفرنس اٹی وزیراعلیٰ بلوچستان میر سرفراز بگٹی، قومی اسمبلی نا باسک نوابزادہ میر جمال خان رئیسانی، صوبائی وزیر بخت محمد کاکڑ، میر ضیاء اللہ لانگو، میر عاصم کرد گیلو، میر سلیم خان کھوسہ، پاکستان پیپلز پارٹی نا راہشون، رئیسانی قبیلہ نا متبرک سیاسی و راجی شخصیت و الس بھلو کچ اسے ٹی ساڑی ئس۔ دود انا بنا ٹی شہید میر سراج خان رئیسانی نا ایصالِ ثواب کن قرآن خوانی و خیرات نا ہم بست وبند کننگاسس۔ وزیراعلیٰ پارے کہ اگہ اونا جان آن بلوچستان نا ویل ایسر مریک تو او تینا جان ءِ تننگ کن ہم تیار ءِ انتئے کہ اوڑکن عہدہ آخا بلکن بلوچستان نا الس نا خذمت کل آن اہم ءِ۔ او پارے کہ کرسی بروک و ہنوک گڑا اسے، اصل مسخت الس نا خذمت و صوبہ ٹی امن و شونداری ءِ۔ میر سرفراز بگٹی پارے کہ بلوچستان اٹی امن کن حکومت ہر وڑ انا گام گیج کننگ کن تیار ءِ۔ ریاست الس نا جان و مال انا رکھ ءِ تینا اولیکو زمواری سرپند مریک۔ او پارے کہ دہشت گردی و بیدادی نا کمک اٹ بلوچستان ءِ پاکستان آن جتا کننگ نا تغ ہچ پورو مفک۔ دہشت گرد آک بیرہ شونداری، شونہالی و الس نا روشنا آخبت اٹی اڑاند جوڑ مننگ کیرہ۔ او پارے کہ حکومت نا اولیکو اولیت تعلیم، جانجوڑی‘ روزگار و بلوچستان نا مدامگی شونداری ءِ‘ وخت اس کہ شرپسند آک ورناتے ریفنگ اٹی ءُ و اوفتے اسہ ہچ دوئی مفروک جنگ اسے ٹی بٹنگ اٹی ءُ۔وزیراعلیٰ بھارتی کاٹم خواجہ غاتے پارے اخس کہ سراج رئیسانی شہید کننگے، دا ڈغار نا ہر اُرا غان اسہ پین سراج رئیسانی اس بش مریک و وطن نا رکھ و سلامتی کن مون آبریک۔ او پارے کہ شہید نوابزادہ میر سراج خان رئیسانی نا مشن برجا سلک و اونا قربانی قوم اکن کسر نا ڈیوا مریک۔ وزیراعلیٰ پارے کہ شہید آتا قربانی تیا سیاست کننگ ارمان نا ہیت اسے‘ حکومت شہید آتا وارث اتٓتون اوار سلوک ءِ و ببری، ہنہ اوڑک، زیارت تون اوار دہشت گردی نا کل زہمی تا درگہ غا ہنسا یکجہتی نا درشانی ءِ کرینے۔ او پارے کہ شہید آتا پد خاہوت آتا رو انگا خواست آتے پورو کننگک و صوبائی حکومت تینا غٹ آئینی زمواری تے پورو کیک۔ او پارے کہ تدوک آ دے ماشکیل اٹی بے گناہ مزور کار آتے شہید کننگا ولے اوفتا وارث آک اسہ جاگہ اس دھرنا تتنو۔ ہنداوڑ منہ دے مست میر شفیق الرحمان مینگل نا اُراغا جلہو مس، او تینا شہید آتے جہہ و جاگہ کرے و لاش تیا سیاست کتو۔ اگہ لاش تیا سیاست کننگ مسخت مسکہ تو او جہہ وجاگہ کننگ نا جاگہ غا برانز کریکہ۔ وزیراعلیٰ پارے کہ کھڈکوچہ سانحہ، سانحہ 8 اگست و پولیس لائن جلہو کون آ است ہسون واقعہ غاتیان پد ہم استیفہ غاتیان ویل آک ایسر متوس بلکن عملی گام گیج کرسا حالیت آتے جوان کننگا۔