چاغی تحصیل چاغی ءِ سب ڈویژن نا درجہ رسینگ نا نوٹیفکیشن جاری

تحصیل چاغی ءِ سب ڈویژن نا درجہ رسینگانے، نوٹیفکیشن جاری کننگا۔ صوبائی حکومت ضلع چاغی نا تحصیل چاغی نا درجہ ءِ ودفسا اودے باقاعدہ سب ڈویژن چاغی جوڑ کرینے۔ دا بابت محکمہ ایس اینڈ جی اے ڈی نا کنڈ آن باقاعدہ نوٹیفکیشن ہم جاری کننگانے۔ حکومت بلوچستان نا دا تاریخی آ فیصلہ نا چاغی نا الس ستاءِ کرسا پارے کہ دا گام علاقہ نا شونداری، جوان انتظامی نظام و الس ءِ درگہ غا سرکاری آسراتی تا فراوانی کن اسہ اہم ءُ مزل نا نشان اس پک مریک۔ سب ڈویژن نا درجہ رسینگ آن داسہ چاغی نا الس ءِ سرکاری‘ انتظامی باندات و کانودی کارروائی تیکن دالبندین و ایلو مر انگا علاقہ ہنوئی تمپک۔ ہراڑان وخت و وسیلہ غاتا بچنگ تون اوار ہندی کہول آ روزگار نا وارخواہی ہم ودی مریک‘ چاغی نا الس دا فیصلہ غا وزیراعلیٰ بلوچستان میر سرفراز بگٹی و ایم پی اے چاغی حاجی میر صادق خان سنجرانی نا است انا ہُب آن منتواری ہرفسا پارے کہ السی ویل آتا ایسری و علاقہ نا شونداری کن دا اسہ متکن ءُ خواست اس ئس ہرا اینو پورو مس۔ چاغی نا السی تپہ غاک اومیت درشان کریر کہ زُوت سب ڈویژن اٹی اسسٹنٹ کمشنر آفس، پولیس، عدالتی و ایلو محکمہ غاتا دفتر آک جوڑ کرسا الس ءِ دمدستی آسودہی فراوان کننگک۔