سب تحصیل ناگ ءِ تحصیل نا درجہ رسینگ ستا کڑزوک پیشرفت اسے،چیئرمین میر قادرداد ساسولی

چیئرمین میر قادرداد ساسولی سب تحصیل ناگ ءِ باقاعدہ تحصیل نا درجہ رسینگ آ خوشی نا درشانی ءِ کرسا پارینے کہ حکومت بلوچستان دا بابت باقاعدہ نوٹیفکیشن جاری کرینے، ہرا ناگ انا الس کن اسہ تاریخی و خوشی نا پیشرفت اسے۔ او پارے کہ دا سرسہبی ایم پی اے واشک حاجی میر زابد علی ریکی نا پدریسہ کوشست، السی جہد و بھرمی پیروی تا بھرم ءِ‘ دا وخت آ ضلعی امیر جمعیت علمائے اسلام (جے یو آئی) مولانا نذیر احمد محمدحسنی، نائب ضلعی امیر مولانا عبدالحکیم لوراجہ، چیئرمین میر قادرداد ساسولی، وائس چیئرمین میر محمد انوار محمدحسنی، کونسلر میر غلام مصطفی محمدحسنی و تحصیل امیر حافظ ابراہیم محمدحسنی ہم دا اہم پیشرفت آ ایم پی اے حاجی میر زابد علی ریکی نا منتواری ہرفسا پاریر کہ علاقہ نا شونداری کن اونا خذمت آک مدام یات تخنگرہ۔ او مستی پاریر کہ ناگ ءِ تحصیل نا درجہ رسینگ آن انتظامی باندات آتے ٹی جوانی بریک، الس ءِ سرکاری آسراتی و خذمت آک اوفتا درگہ غا دوئی مریرہ، شونداری ڈٹ آتیا عمل درآمد اٹی ترندی بریک و چنکا سرکاری کاریم تے کن مر انگا علاقہ غاتا سفر کننگ نا گرج مفک۔ او پاریر کہ حکومت نا دا فیصلہ علاقہ نا شونداری، شونہالی و جوان حکمرانی نا وڑ انا کسر آ اسہ اہم ءُ مزل نا نشان اس پک مریک۔ اخیر اٹ او ناگ انا الس ءِ دا تاریخی سرسہبی آ است انا ہُب آن مبارکبادی ترسا اومیت درشان کریر کہ تحصیل نا درجہ رسینگ آن پد علاقہ ٹی شونداری نا اسہ پوسکن ءُ دور اس بنا کیک و الس ءِ زیات آن زیات بنداوی آسراتی فراوان کننگک۔