او آئی سی زالکار وزارتی کانفرنس نا کماشی پاکستان کن بھلو شرفمندی اسے،اعظم نذیر تارڑ

بنجائی وزیرِ کانود و انصاف اعظم نذیر تارڑ پارینے کہ او آئی سی وزارتی کانفرنس زالبول نا کماشی پاکستان کن بھلو شرفمندی اسے، پاکستان کماشی نا زمواری کن تیار ءِ۔ نن دا زمواری تے جوان وڑ اٹ سر ایتنہ و زالبول آتا حق آتا ایجنڈا ءِ مستی دینہ‘ بنجائی وزیرِ کانود و انصاف اعظم نذیر تارڑ او آئی سی وزارتی کانفرنس زالبول نا بابت ہیت و گپ کرسا پارے کہ پاکستان نہہ میکو او آئی سی وزارتی کانفرنس زالبول نا مہمانداری کننگ اٹی ءِ، او آئی سی کانفرنس نا مہمانداری پاکستان کن شرف اسے، کانفرنس اٹی 57 باسک ملک آتا نمائندہ غاک شریک ءُ، جتا جتا تکنیکی ورکنگ گروپ ہم کانفرنس نا بشخ ءُ۔ اعظم نذیر تارڑ پارے کہ کانفرنس نا تکنیکی دیوان آک برجا ءُ، بنجائی وزارتی دیوان دوشنبے نا دے اڈ ہلیک، دیوان اٹی مبصر و وزارتی ڈل آک بشخ ہلیرہ۔ وزیرِ کانود پارے کہ کانفرنس نا چیئرمین شپ مصر آن پاکستان ءِ تننگک‘ نیاڑی تا کڑد و شونداری نا جاچ ءِ ہلنگک، نیاڑی تے مون تروک چیلنج آتیا ہم سجفنگک، کانفرنس نا اخیر اٹ اسلام آباد اعلامیہ جاری مریک۔ اعظم نذیر تارڑ پارے کہ وزیراعظم بنائی دیوان آن تران کیک، وزارتِ خارجہ کانفرنس نا اڈ تننگ اٹی اہم ءُ کڑد اس ادا کننگ اٹی ءِ، وزارت حوالکاری نا کمک ناستاءِ کینہ۔ بنجائی وزیر عطا اللہ تارڑ نا کمکاری نا منت وار اُن۔ اعظم نذیر تارڑ پارے کہ کانفرنس نا وَت زالبول آتے بریبر حق تننگ ءِ۔ نیاڑی تے وتواجہ کننگ آ خاص چکار کننگک، پاکستان اٹی نیاڑی تا شونداری نا گام گیج آتے پیش کننگک۔ وزیراعلیٰ پنجاب مریم نواز شریف کانفرنس اٹی بشخ ہلیک، بنجائی وزیر شزا فاطمہ ہم بشخ ہلیک، نیاڑی تا بھلو کچ اس کانفرنس اٹی اوار مریک‘ دا مہمانداری اولیکو وار پاکستان ءِ رسینگانے‘ اعظم نذیر تارڑ پارے کہ او آئی سی اقوامِ متحدہ غان پد ارٹمیکو بھلا فورم ءِ، پاکستان ءِ اِرا سال اکن کماشی رسینگ انگ ءِ، دا پاکستان کن بھلو شرف اسے، پاکستان زمواری تے جوان وڑ اٹ سر ایتک۔