آبنائے ہرمز آ ایران نا کوزہ اف، واپاری جہاز آتا ہن و بر کن ملوک ءِ، امریکی صدر ڈونلڈ ٹرمپ

امریکی صدر ڈونلڈ ٹرمپ پارینے کہ آبنائے ہرمز واپاری جہاز آتا ہن و بر کن ملوک ءِ۔ امریکی ٹی وی چینل این بی سی ءِ تروک اسہ انٹرویو اسے ٹی صدر ڈونلڈ ٹرمپ پارے کہ نن ننکان ایران آ بمباری کرین، او بھاز ناجوڑ ذہنیت نا بندغ ءُ۔ ٹرمپ پارے کہ او دَرو اسہ معاہدہ اسے آ امنا کریر نن کن دا اسہ جوان ءُ معاہدہ اس ئس، ہراٹی ہچ ءُ جوہری پروگرام اس الو، او غٹ گڑا غاتے یلہ کریسر، ولے اوکان پد او کمرہ غان پیشن ہنار و اسہ گھنٹہ اسے نا تہٹی اسہ جہاز اسے آ ڈرون جلہو کریر، او ناجوڑ ذہن انا بندغ ءُ۔ ریپبلکن سینیٹر و تینا خڑک انا سنگت لنزے گراہم نا کزیت آ ہیت کرسا ٹرمپ پارے کہ او سینیٹر لنزے گراہم تون اونا کزیت آن منہ گھنٹہ مست فون آ ہیت کریسس۔ ٹرمپ پارے کہ دمدرینگ آن بیدس او پین اسُل جوان ئس۔ کنا خیال اٹ گراہم نا کزیت بھاز اناگت مس و شاید دنیا غان ہننگ نا دا خراب ءُ وڑ اس الو۔ ایلو کنڈ آ ایرانی نیشنل سیکورٹی و فارن پالیسی کمیشن نا ترجمان ابراہیم رضائی دعویٰ کرینے کہ آبنائے ہرمز نا کنٹرول ءِ زور انا زی آ دوئی کرینن۔ او پارے کہ ہندا واک اٹ آبنائے ہرمز آ کنٹرول ءِ برجا تخنہ۔ ابراہیم رضائی نا کنڈ آن دا دعویٰ ایرانی پاسدارانِ انقلاب نا آبنائے ہرمز ءِ ایلو پرمان اسکان پورو وڑاٹ بند کننگ نا پڑو آن پد کننگا۔ ایلو پارہ قطر ڈیہہ اٹ ودوک آ چک و تاڑ ءِ مون آ تخسا مچ آ ملک اٹی گیشتری سمندری سرجز آتے وختی وڑاٹ توننگ نا پڑو کرینے، وخت اس کہ ایران نا کنڈ آن کروک جلہو آتا سخت انگا لوز آتے ٹی مذمت ءِ کرسا اوفتے قطر نا وتواجہی و جہانی کانود نا خلاف ورزی گوندا۔ قطری وزارت ٹرانسپورٹ نا کنڈ آن جاری بیان نا رِد اٹ السی رکھ ءِ مون آ تخسا کل سیلانی کشتی، ماہی گیری کشتی، جیٹ اسکیز و ایلو چنکا سمندری گاڈی تا ہن و بر ءِ دمدستی وڑاٹ تورفنگانے۔ دا پابندی دمدستی وڑاٹ نافذ العمل ءِ و بروک آ پارت اسکان برجا سلک۔ وزارت پیدوار کرے کہ جہانی بحری معاہدہ غاتا رِد اٹ چلینگوک واپاری و جہانی جہاز آک دا پابندی آن آجو مریرہ و او پک کروک کانود و ضابطہ غاتا رِد اٹ تینا سرجز آتے برجا تخنگ کیرہ۔ ہندا وڑ خلیجی ملک سعودی عرب، عمان و کویت داسہ نا ایرانی جلہو آتا سخت انگا لوز آتے ٹی مذمت ءِ کرسا اوفتے علاقائی سلامتی، وتواجہی و جہانی کانود نا خلاف ورزی گوندار۔ سعودی وزارتِ خارجہ تینا بیان اٹی پارے کہ ایران نا وڑ و ڈول ڈیہہ انا امن و سوگوی ءِ نسخان رسیفنگ اٹی ءِ۔ وزارت نا رِد اٹ ایران نا کنڈ آن واپاری جہاز آتیا جلہو و بحری کسر تے شست کننگ اقوام متحدہ نا چارٹر، اسلامی کمکار تنظیم نا اصول و جہانی کانود نا خلاف ورزی ءِ۔ سعودی عرب پارے کہ دا وڑ انا گام گیج آتیان نئے بیرہ ڈیہہ اٹ چک وتاڑ ودک بلکن جہانی بحری واپاری‘ جہاز رانی و آبنائے ہرمز اٹی ہن و بر نا آجوئی ہم گڑتی نا گواچی مننگ اٹی ءِ۔ ایہن تو داسہ نا ایرانی جلہو آتیٹی سعودی عرب ءِ دراست شست کننگ تنے ولے تدوک آ ہفتہ آبنائے ہرمز آن تدینگوک آ اسہ سعودی آئل ٹینکر اس جلہو اٹی زہمی مسوسس۔